Европа останува без камионџии: Македонија на удар од транспортната криза

Во Европа во моментов недостигаат околу 500.000 возачи на камиони, а оваа бројка забрзано расте. Недостигот пред две години изнесувал 233.000. Проблемот допрва ќе станува поголем поради сѐ поголемиот број пензионирања. Според процените на ИРУ (International Road Transport Union), до 2029 година во пензија ќе заминат околу 17 отсто од сегашните возачи.

Според официјалните статистики, просечната возраст на европските камионџии е 47 години, а над 30 отсто од нив се постари од 55 години. Само 5 отсто од возачите се помлади од 25 години. Поради ваквите бројки се стравува дека до 2028 година на европскиот континент ќе недостигаат над 745.000 возачи на тешки товарни возила. Најалармантна е состојбата во Шпанија, Италија и Германија.

Истовремено, кварталниот раст на регистрациите на тешки товарни возила во земјите од Европската Унија изнесува над 16 отсто, а дури 75 отсто од транспортот се одвива со камиони. Поради тоа, Европа прави обиди за ублажување на деценискиот проблем.

Една од мерките е обуките наместо од 18 да почнуваат од 17 години, а младите возачи добиваат и субвенции додека се обучуваат. Континуирано се преземаат мерки за подобрување на условите за работа, а државите ги олеснуваат и процедурите за вработување возачи од земјите што не се членки на ЕУ.

Нема возачи за 30 отсто од возилата во Македонија

Овие мерки за подобрување на состојбата во ЕУ го влошуваат проблемот во земјава, затоа што македонските возачи си заминуваат, па за домашните компании недостигот станува уште поголем.

„Во нашата држава недостигаат приближно 30 отсто од потребниот број на возачи во согласност со капацитетот на возниот парк за комерцијални цели, што значи дека имаме нефункционални возила, кои и кога стојат создаваат трошоци и го оптоваруваат работењето на превозниците“, вели Билјана Муратовска од асоцијацијата на македонски транспортери „Макамтранс“.

Македонските возачи главно заминуваат за Германија, Белгија, Чешка и Словенија. Европските држави им нудат многу подобри услови не само на работниците туку и на нивните семејства, па затоа, вели Муратовска, земјава се соочува со силен одлив на возачи на средна возраст, но и на млади.

Земјава има голем број ограничувања кога станува збор за транспортот, од потребните дозволи до долгото задржување по границите, а возачите од земјите што не се членки на ЕУ подлежат и на построги контроли во земјите на Унијата, што е уште една причина за заминување.

Нема даночни олеснувања, растат трошоците

Бавните процедури се причина и платите да не бидат конкурентни во земјава. Долгите чекања ја намалуваат продуктивноста, а нема ни даночни стимулации за возачите, што дополнително ја намалува атрактивноста на професијата, вели Муратовска.

Даночното олеснување што државата го дава на име исплата на дневници на возачите е исто како и за вработените во администрација. „За лица што половина од својот век го поминуваат во кабина со големина два на два метри, кои не користат никакви привилегии, како што се ноќевање во хотел или платен оброк, ова не е поволен елемент“, вели таа и додава дека ваквите политики го прават македонскиот превоз поскап.

Од лани транспортните компании имаат и нов проблем, што ги зголемува нивните трошоци и ги прави уште поскапи. Имено, домашните превозници плаќаат ДДВ од 18 отсто иако работат само на странски територии, во другите земји нема вакви давачки.

Најголемиот проблем допрва доаѓа

Од втората половина на следната година македонските превозници ќе се соочат со нов проблем. Во Унијата стапува во сила системот за влез и излез (Entry-Exit System и EES), кој претставува нов ИТ-систем чија цел е да ги зголеми безбедноста, ефикасноста и контролата на границите при влез и излез на државјани од трети земји односно оние што доаѓаат од земји што не се дел од Шенген-зоната.

Примената на системот значи дека електронски ќе се бројат деновите на престој на возачите и ќе се издаваат потврди за престојот (ETIAS).

„Тоа значи дека одново ќе се вратиме на некој вид на систем на визи“, вели Муратовска и додава дека за превозниците тоа ќе биде дополнителен финансиски товар и уште поголем недостиг од возачи.

Во моментов нема коментари за веста. Биди прв да коментира...

Остави коментар