Малопродажната цена на еуродизелот (Д-Е V) се намалува за 2 денари по литар, а цената на мазутот М-1 НС за 1,215 денари по килограм, соопшти Регулаторната комисија за енергетика и водни услуги. Цената на останатите горива останува иста.
Од полноќ, цената на еуродизелот ќе изнесува 99,50 денари за литар, а малопродажната цена на мазутот М-1 НС ќе изнесува 52,740 денари за килограм. Малопродажната цена на еуросуперот БС-95 останува на 87,50 денари за литар, еуросуперот БС-98 чини 90 денари за литар, додека екстра лесното масло за домаќинство (ЕЛ-1) се продава за 97,5 денари по литар.
Од комисијата објаснуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 2,754 проценти или за 24,200 долари по тон, кај дизелот намалување во просек за 2,619 проценти или за 30,200 долари по тон, кај екстра лесното масло намалување во просек за 2,034 проценти или за 22,200 долари по тон и кај мазутот намалување во просек за околу 2,505 проценти или за 15,150 долари по тон.
„Поради тоа во структурата на цените на нафтените деривати е извршено соодветно прилагодување. Курсот на денарот во однос на доларот во изминатиот период, во просек изнесува 61,4987 денари за долар и е за околу 0,132 проценти понизок од курсот на доларот (61,5802 денари за долар) по кој беа формирани цените со претходната пресметка. Имајќи ги предвид влијанијата на овие елементи во формирањето на цените на нафтените деривати според методологијата, како и одредбата дефинирана со член 8 став (3) од правилникот за формирање на највисоки малопродажни цени на одделни нафтени деривати и горива за транспорт, малопродажните цени на нафтените деривати согласно методологијата за формирање на цените, се намалуваат во просек за 0,84 проценти“, соопшти комисијата.
.webp){kind=icon}
