.webp){kind=icon}
Членот на Федералните разерви (ФЕД), Патрик Харкер, рече дека очекува темпото на зголемување на каматните стапки да забави бидејќи монетарната политика се приближува до доволно рестриктивно ниво.
Претседателот на Банката на федерални резерви на Филаделфија во говор посочи дека некаде во текот на следната година ФЕД би можел да остане на тоа доволно рестриктивно ниво и да остави монетарната политика да го направи своето.
Овој месец, ФЕД повторно ги зголеми каматните стапки за 75 базични поени, четврти пат по ред, при што каматната стапка дојде во опсег меѓу 3,75 и 4 отсто. Тековното затегнување на монетарната политика е најостро од 80-тите години на минатиот век.
„Веројатно наскоро ќе биде во ред да се забави со темпото на зголемување на каматните стапки. Важно е да се каже дека направивме многу, но и дека има уште работа“, рече потпретседателката на ФЕД, Лаел Брејнард.
Инвеститорите очекуваат ФЕД дополнително да ги зголеми каматните стапки на состанокот од 13 до 14 декември, но за 50 базични поени, по знаците дека попушта притисокот врз цените.
Прочитајте повеќе: Инфлацијата во САД забави повеќе од очекуваното на 7,7 отсто
Сепак, повисоките каматни стапки допрва треба да се одразат на пазарот на трудот, каде што високата вработеност ги зголемува довербата на потрошувачите и трошењето.
Според Харкер, постојат знаци дека економијата забавува иако пазарот на труд е на својот врв.
„Податоците покажуваат дека трошењето од кредитни картички забавува, а тој тип сочинува 70 отсто од купувањата во САД“, истакна Харкер. Тој додаде дека забавуваат и инвестициите во недвижности.
