Банката на федерални резерви (ФЕД) е подготвена да го ублажи своето агресивно затегнување в среда, истовремено сигнализирајќи дека каматните стапки на крајот ќе бидат повисоки во споредба со претходните прогнози.
Тешкиот дел за претседателот Џером Пауел ќе биде да ги убеди инвеститорите дека ова не е маневар и дека официјалните лица нема предвреме да го прекинат нападот против инфлацијата, која е трипати повисока од нивната цел од два отсто.
Се очекува Федералниот комитет за отворен пазар да ги зголеми стапките за 50 базични поени и да ја доведе својата референтна целна стапка на опсег од 4,25 до 4,5 отсто, што е највисоко од 2007 година. Свежите квартални економски проекции објавени по состанокот, исто така, ќе дадат одредени показатели за тоа колку повеќе креаторите на политиката очекуваат да се зголемат стапките.
Просечната процена на економистите анкетирани од „Блумберг“ е врв од околу 4,9 отсто, откако Пауел рече дека ќе треба да ги подигнат стапките повисоко од предвиденото. Тоа подразбира дека би требало да се повлечат потези од 25 базични поени во февруари и март и потоа политиката да се стави на пауза. Инвеститорите гледаат на работите на ист начин.
Одлуката и прогнозите ќе бидат објавени во 14 часот по локално време во Вашингтон. Пауел ќе одржи прес-конференција 30 минути подоцна.
Американската базична инфлација се лади
Зголемувањето е најниско во повеќе од една година / Bloomberg
Податоците за потрошувачките цени објавени во вторникот сугерираат дека најлошата инфлација во САД можеби поминала, што им олеснува на функционерите да се префрлат на помало зголемување на стапката. Но Пауел би можел да ја искористи својата прес-конференција за да ја потсети јавноста дека функционерите нема да попуштат додека инфлацијата не е јасно на патеката назад до 2 отсто.
„Сите погледи ќе бидат насочени кон конференцијата и она што ќе ни го каже претседателот на ФЕД во однос на патот за каматните стапки понатаму“, вели Лидија Бусур, виша економистка за „ЕИ Партенон“ (EY Parthenon), осврнувајќи се на кварталните проекции за стапките.
Патеки за идните стапки
На состанокот во септември, претставниците на ФЕД прогнозираа дека стапките ќе достигнат 4,6 отсто до крајот на следната година. Но креаторите на политиката велат дека тие очекувања оттогаш се зголемиле по економските податоци, кои покажуваат дека иако инфлацијата се намалува, таа и понатаму е тврдоглаво висока.
Официјалните лица, исто така, велат дека пазарот на трудот сè уште не е во рамнотежа, при што побарувачката за работници ја надминува понудата на работната сила и растот на платите не се намалува.
„Проекциите ќе понудат увид во најновите ставови на креаторите на политики за тоа каде очекуваат да одат стапките. Но шефот на Банката на федерални резерви веројатно нема да се заложи за конкретен пат, претпочитајќи да ги држи отворени сите опции“, вели Мајкл Пуглизе, економист во „Велс Фарго“ (Wells Fargo & Co).
„Мислам дека тие ќе сакаат да ја зачуваат флексибилноста“, додаде тој.
Услови за пауза
Проекциите за стапката би можеле да понудат индиции за тоа колку брзо официјалните лица очекуваат да го паузираат зголемувањето. „На пример, поскромното зголемување на терминалната стапка може да сугерира дека службениците би можеле да прекинат со зголемување веднаш во март, додека повисок врв веројатно би сугерирал дека зголемувањето на стапките може да продолжи и во следната година“, вели Тим Дуј, главен американски економист за „СГХ Макро адвајсорс“ (SGH Macro Advisors).
Но тој вели дека исто така ќе биде важно да се слушне од Пауел за тоа како официјалните лица ќе знаат дека е време да се запре зголемувањето на стапката или ќе треба и натаму да покачуваат.
„Тие се приближуваат до нешто што мислат дека е терминална стапка и се чини дека е нешто блиску до 5 отсто,“ вели Дуј.
.webp){kind=icon}
