Војната со Иран избриша 2,5 билиони долари од обврзниците, се повторува сликата од 2022 година

Стравувањата од стагфлација поради војната со Иран избришаа повеќе од 2,5 билиони долари од вредноста на глобалните обврзници во март, што е на пат да стане најголема месечна загуба во повеќе од три години.

Обврзниците паѓаат бидејќи растот на цената на нафтата ја забрзува инфлацијата, што ја нагризува вредноста на фиксните исплати од долгот. Иако падот на пазарната вредност на обврзниците е помал од околу 11,5 билиони долари загубени на глобалните пазари на акции, тој е можеби понеочекуван, бидејќи должничките инструменти обично добиваат на вредност во време на геополитички турбуленции.

„Пазарите почнуваат да го вградуваат во цените она што, според мене, наскоро ќе се манифестира како стагфлациски притисок“, изјави во интервју за телевизијата „Блумберг“ Кетрин Руни Вера, главен пазарен стратег во „Стоун екс“ (StoneX Group Inc.).

„Колку подолго трае ова, толку повеќе може да растат цените на нафтата.“

Bloomberg

Вкупната пазарна вредност на државниот, корпоративниот и долгот што се препродава се намали на 74,4 билиони долари од речиси 77 билиони на крајот на февруари, според индексот на „Блумберг“. Тоа е на пат да стане најголем пад од септември 2022 година, кога Фед беше во агресивен циклус на зголемување на каматните стапки. Во процентуална смисла, овој показател се намали за 3,1 отсто овој месец.

Падот го предводат државните обврзници, при што индексот на „Блумберг“ за државни обврзници се намали за 3,3 отсто во март, додека корпоративните обврзници паднаа за 3,1 отсто, покажуваат податоците.

Приносите на американските државни обврзници се искачија на највисоките нивоа во последните месеци по трета последователна недела загуби на пазарот на обврзници, поради шпекулациите дека Фед ќе биде принуден повторно да ги зголеми каматните стапки за да ја ограничи инфлацијата. Во Азија, приносите на државните обврзници во Индија, Јапонија и Јужна Кореја исто така пораснаа.

Приносите на десетгодишните обврзници на Австралија во понеделникот се искачија на највисоко ниво од 2011 година, додека приносите во Нов Зеланд се на највисоко ниво од мај 2024 година.

Распродажбата на обврзници се засили во понеделникот откако американскиот претседател Доналд Трамп се закани дека ќе нападне ирански електроцентрали доколку земјата повторно не го отвори Ормускиот Теснец. Иран возврати со порака дека целосно ќе го затвори морскиот премин ако се случи тоа.

Фед би можел да ја разгледа можноста за зголемување на каматните стапки на состанокот за монетарна политика во април доколку цените на енергијата останат високи, а стапката на невработеност стабилна, напишаа стратезите за каматни стапки од „БНП Париба“ (BNP Paribas) во белешка до клиентите минатата недела. Европската централна банка исто така ќе треба да размисли за зголемување на каматните стапки веќе следниот месец ако ценовните притисоци дополнително се засилат поради војната со Иран, изјави минатата недела членот на Управниот совет Јоаким Нагел.

Поголемите инфлаторни притисоци ја ограничуваат способноста на централните банки да интервенираат и некои од нив ќе бидат принудени да ги зголемуваат каматните стапки во услови на забавување на економскиот раст, за да ги ограничат инфлацијата и слабеењето на валутите, изјави Трин Нгујен, економист во „Натиксис“ (Natixis) во Хонгконг.