Гита Гопинат, втората по должност претставничка на Меѓународниот монетарен фонд (ММФ), изјави дека глобалната економија покажува знаци на отпорност, а членот на Управниот совет на Европската централна банка Франсоа Вилерој де Галхау предвиде дека Европа би требало да избегне рецесија оваа година.
Коментарите, објавени на телевизијата Блумберг во средата, беа во согласност со општиот тон на претпазлив оптимизам на Светскиот економски форум (СЕФ/WEF) во Давос. Кинескиот потпретседател Лиу Хе во вторникот, на денот на отворањето, истакна дека втората по големина економија во светот ќе се нормализира, бидејќи ќе се олеснат ограничувањата за ковид-19.
Говорот на германскиот канцелар Олаф Шолц, единствениот лидер на Г7 што присуствува на настанот, е еден од најважните моменти во средата. Шолц разговараше со главниот уредник на Блумберг, Џон Миклетвејт, во вторникот во Берлин и рече дека е уверен оти Германија ќе избегне рецесија годинава и дека е во преговори со сојузниците за испраќање тенкови во Украина.
На форумот треба да се обратат и украинскиот претседател Володимир Зеленски и генералниот секретар на Обединетите нации, Антонио Гутереш. Посетете ја телевизијата Блумберг за интервјуата со извршниот директор на норвешкиот инвестициски фонд Николај Танген, извршниот директор на „Мубадала“, Калдун ал Мубарак, и извршниот директор на „Стандард чартерд“, Бил Винтерс, меѓу многуте други.
Вилерој изјави дека Европа годинава би требало да ја избегне рецесијата и дека и вкупната и основната инфлација веројатно ќе го достигнат врвот во првата половина на 2023-та. „Но фокусот мора да остане на нашата борба против инфлацијата, јас сум многу јасен за тоа. Ќе ја добиеме оваа битка, дозволете ми да бидам крајно јасен. Ќе ја вратиме инфлацијата на два отсто до крајот на 2024-2025 година“, заклучи Вилерој во гостувањето на ТВ Блумберг.
Јапонската централна банка се соочува со поинаков предизвик од глобалните колеги поради високиот ризик основната инфлација да заврши под целта, според заменик-директорката на ММФ. „Јапонската централна банка мора да се справи со доста сложена одлука. За разлика од најголемите светски економии, нивната инфлација расте, но останува висок ризикот дека инфлацијата ќе падне далеку под нивната цел“, рече првата заменик-директорка на ММФ, Гита Гопинат, во интервју за ТВ Блумберг.
Целокупната инфлација најверојатно го достигна врвот, иако некои сектори, како што е услужниот сектор, сè уште се во пораст во некои земји. Гопинат истакна дека 2023 година ќе биде тешка. Новите прогнози на ММФ за глобалната економија треба да бидат објавени на крајот на месецот.
„Прогнозите ќе бидат во согласност со она што го објавивме во октомври. Откако поминавме низ околу три круга на намалувања, барем го немаме полошиот исход што го гледаме во овој момент. Иако годинава имаме глобален раст, кој го допре дното, се подобрува кон втората половина од годинава, а потоа во 2024 година. Тоа е затоа што гледаме знаци на отпорност“, заклучи Гопинат.
.webp){kind=icon}
