Економистите од компанијата „Банка на Америка“ (Bank of America Corp. - BofA) и „Голдман Сакс“ (Goldman Sachs Group Inc.) сметаат дека ФЕД во САД ќе продолжат да ги зголемуваат каматните стапки подолго од очекуваното поради поповолните економски показатели.
Иако дел од ова може да се припише на сезонското ажурирање, „тешко е да се игнорираат“ податоците за вработување кои сугерираат дека пазарот на трудот е во нагорна линија, посочуваат во белешка групата економисти на BofA предводени од Мајкл Гапен. Тие сега предвидуваат дека ФЕД ќе ја зголеми референтната каматна стапка за 25 базични поени во јуни, а крајниот опсег ќе биде од 5,25 до 5,5 проценти. Претходните очекувања беа дека овој опсег ќе биде за четвртина процентен поен помал.
Инвеститорите сè повеќе веруваат дека ФЕД ќе мора дополнително да ги зголеми стапките, а пазарите темелно ги проценуваат изгледите за 25 базични поени за март и мај. Според пазарите, веројатноста дека истото ќе се случи и во јуни е 70 проценти.
Економистите на „Голдман сакс“ во четвртокот ја ревидираа својата проекција која сега вклучува трето зголемување од 25 базични поени во јуни. Како причини ги наведуваат „отпорниот раст и поповолните вести за инфлацијата“. Економските извештаи објавени неделава покажаа дека растот на цените е побрз од очекуваното, но и дека продажбата на мало останува силна.
Американската централна банка агресивно ја зголеми својата референтна каматна стапка (која беше блиску до нула во март 2022 година) на опсег од 4,5 до 4,75 проценти. Двајца функционери на ФЕД кои се за натамошно заострување на монетарната политика рекоа дека има причина да се зголемат стапките за половина процентен поен во февруари, додавајќи дека поголеми покачувања сè уште се на маса во поглед на следните состаноци.
.webp){kind=icon}
