Вредноста на пазарот на недвижности во САД забележа најголем пад од 2008 година, а скокот што се случи за време на пандемијата се чини дека сега е завршен.
Откако достигна 47,7 билиони долари во јуни, целиот американски пазар на станови загуби 2,3 илјади милијарди долари (или околу 4,9 отсто од неговата вредност) во втората половина на 2022 година, според податоците на „Редфин“ (Redfin). Процентуално гледано, ова е најголемиот пад од кризата во 2008 година, кога пазарот падна за 5,8 отсто од јуни до декември.
Купувачите, кои веќе се погодени од растот на цените, сега мора да се грижат за зголемувањето на каматните стапки, кои минатата година беа двојно зголемени. Со падот на конкуренцијата дојде и пад на цената на просечниот имот од 433.133 долари во мај на 383.249 долари.
„Пазарот на недвижности изгуби дел од својата вредност, но повеќето продавачи и понатаму имаат полза од скокот забележан на пазарот за време на пандемијата“, посочија од „Редфин“, чие истражување го предводеше економистот Чен Жао. Вкупната пазарна вредност сè уште останува за 13 билиони повисока од нивото во февруари 2020 година.
Исто така цените на недвижностите не бележат драстични падови. Во декември вкупната вредност на сите куќи во САД беше за 6,5 отсто повисока отколку во декември 2021 година.
Bloomberg
Напредок во Флорида
Загубите забележани од продавачите на недвижности зависат од локацијата на недвижниот имот. Најголем пад е забележан во градовите каде што цените се повисоки, како Сан Франциско или Њујорк. Оние што купиле недвижен имот во области што станале популарни за време на пандемијата (особено во Флорида) сè уште имаат корист од својата инвестиција.
Ова е особено точно во Мајами, каде што вкупната вредност на недвижностите скокна за 20 отсто на годишно ниво, достигнувајќи 468,5 милијарди во декември. Ова е најголемото годишно процентуално зголемување меѓу областите што биле во фокусот на истражувањето.
Додека вкупната вредност низ САД падна, пазарот на недвижности во Мајами сè уште е на нивоата во јули (околу 472 милијарди долари). Сопствениците на куќи во Норт Порт во Сарасота, Ноксвил во Тенеси и Чарлстон во Јужна Каролина бележат добивки од повеќе од 17 проценти во 2022 година.
Со преселувањето на ИТ-работниците на подостапни места, пазарот на недвижности во Сан Франциско падна за 6,7 отсто оваа година, додека Оукланд и Сан Хозе забележаа пад од 4,5 отсто и 3,2 отсто, соодветно. Другите градски области, вклучувајќи ги и Њујорк и Сиетл, исто така забележаа пад.
„Зголемувањето на вредностите во Флорида им овозможува на луѓето да се преселат од север, а од неодамна и од западниот брег“, посочува Елена Флек, агентка за недвижности во Палм Бич, Флорида.
.webp){kind=icon}