Вашингтон повторно се врти кон својата омилена екипа за чистење на Волстрит, за да го среди нередот предизвикан од американската банкарска индустрија.
По речиси двомесечни превирања во банкарскиот сектор - и загриженоста кај инвеститорите дека може да настанат повеќе проблеми во иднина - „Блекрок“ (BlackRock Inc.) само што започна со својата работа.
Советодавната единица за финансиски пазари на фирмата (ФМА), еден вид SWAT тим за финансиска криза, е ангажирана да ги зголеми и продаде инвестициите поврзани со две пропаднати банки, „Силикон валеј“ (СВБ) и „Сигначур“. Третата, „Фрст рипаблик“, ѝ е продадена на „ЏП Морган“, но пазарите и натаму се на штрек.
За ФМА, клиент е Федералната корпорација за осигурување депозити (ФДИЦ), а предизвикот е да се најдат купувачи за 114 милијарди американски долари во хартии од вредност што СВБ и „Сигначур“ ѝ ги оставиле на американската влада, а сето тоа дополнително да не ги размрда финансиските пазари.
Тоа е голема работа - најголема од ваков вид досега - и таква што ќе го зацврсти „Блекрок“, најголемиот светски менаџер на средства, уште подлабоко во регулаторниот апарат на Вашингтон. Упатени извори сугерираат дека потенцијалната исплата не се пари: таксите не се откриени, но позицијата на „Блекрок“ за претходните проекти е скромна.
Bloomberg
Вистинската награда, како што често се случува во вакви моменти, доаѓа во форма на пристап, престиж и влијание - место на масата кога ќе се појави следната криза или можеби следната можност. Таа моќ ја зацврстува и репутацијата на главниот извршен директор на „Блекрок“, Лери Финк, како моќен брокер - и го привлекува вниманието за растечкиот досег на компанијата на глобалните пазари.
Финк потроши години позиционирајќи ја ФМА како кризен менаџер што го фаворизираат владите и централните банки. Најчесто зад сцената, советодавната единица најголемиот дел од времето го минува (доколку не склучува договор со владата) советувајќи ги финансиските фирми низ светот за ризиците за нивните книги.
Во 2008 година „Блекрок“ расчистуваше по фијаската на „Бер Стернс“ (Bear Stearns) и „Американ интернешнл груп“ (American International Group), а подоцна ѝ помогна на Европската централна банка (ЕЦБ) со банкарски стрес-тестови. Кога на Федералните резерви (ФЕД) им беше потребна помош за спасувачка мисија во пандемијата во 2020 година, официјалните лица го повикаа „Блекрок“ да помогне во стабилизирањето на пазарот на корпоративни обврзници.
Во поново време, покрај новата работа од ФДИЦ, „Блекрок“ го советуваше гигантскиот нов инфраструктурен фонд на Саудиска Арабија и ѝ помага на Украина да создаде фонд за обнова од војната. Исто така ѝ помагаше на „Кредит Суис“ откако банката падна во рацете на конкурентската УБС (UBS Group AG).
Bloomberg Mercury
„Задачите од висок профил го истакнуваат влијанието на ’Блекрок’ кај официјалните лица и создаваат еден вид ’организациска зависност’ од фирмата од страна на американската влада“, вели Сауле Омарова, професорка на универзитетот „Корнел“, која беше номинирана од претседателот Џо Бајден за највисока банкарска регулаторна функција пред да се повлече во услови на противење од финансиската индустрија и некои сенатори.
„’Блекрок’ навистина се чини дека е најдобар избор кога станува збор за големи, политички истакнати и системски важни видови на продажба и управување со средства“, рече Омарова во телефонски разговор. „Тоа создава многу важен потенцијал за ’Блекрок’ да негува еден вид поврзаност со федералната влада“.
Омарова смета дека владата треба да размисли да има сопствена единица за управување со средства за да се справи со овој вид проблеми.
Работата е деликатна. Персоналот на ФМА мора да се дистанцира од трговците на „Блекрок“ и од менаџерите со пари, да ги чува своите планови во тајност и да избегне некому да му даде нефер предност. За да се минимизираат потенцијални конфликти, групата има свој дел на 16-от кат од седиштето на фирмата во Њујорк и има посебен пристап до огромниот систем за ризик и портфолио на „Блекрок“, наречен „Аладин“.
Првичниот впечаток е дека засега работата се одвива добро. Се чини дека „Блекрок“ вешто управуваше со почетната рунда на продажба на 18 април, која вклучуваше хартии од вредност поддржани со хипотека. Претстојните рунди - што би можелe да достигнaт еквивалент од 2 милијарди долари неделно и да траат со месеци - можеби нема да бидат толку лесни, велат аналитичарите.
Експертите на „Морган Стенли“ во белешката до клиентите од 21 април нагласуваат дека напорите се случуваат додека пазарот на хипотеки се движи во „неистражени води“. Неизвесниот курс на пазарите и економијата нема да помогне.
Оваа недела, на пример, инвеститорите рекоа дека тимот на „Блекрок“ би можел да има предизвик со продажбата на општински обврзници останати од СВБ, бидејќи тие главно биле долгорочни хартии од вредност со релативно ниски купони.
.webp){kind=icon}
