Досега невидено: МАЕ ќе ослободи 400 милиони барели нафта

Членките на Меѓународната агенција за енергија  - МАЕ (IEA) постигнаа договор за досега невидено ослободување на 400 милиони барели нафта од стратешките резерви, јави „Блумберг“.

Координираната акција има за цел да го намали силниот притисок врз енергетските пазари предизвикан од ескалацијата на конфликтот помеѓу САД-Израел и Иран што ги вовлече и останатите земји од Персискиот залив и прерасна во регионален судир на Блискиот Исток.

„Земјите на МАЕ ќе ослободат 400 милиони барели нафта за да ги компензираат загубените количини поради практичното затворање на Ормускиот Теснец“, изјави извршниот директор на МАЕ, Фатих Бирол, во обраќање во живо на веб-страницата на агенцијата во среда.

И покрај рекордниот обем на интервенција, пазарите реагираа претпазливо. Цената на суровата нафта Брент накратко падна по официјалната потврда на МАЕ, но брзо се стабилизираше на околу 91 долар за барел.

Главната причина за воздржаноста на инвеститорите е недостатокот на конкретен план за имплементација. Имено, сè уште не е разјаснето со каква динамика и темпо ќе се пушти нафтата во оптек, што останува клучно прашање за понатамошно формирање на цените. 

Нема знаци за попуштање на војната, напротив

Францускиот претседател Емануел Макрон изјави дека членките на групата Г-7 ќе го организираат ослободувањето на количините нафта од своите стратешки резерви следниве денови, но дека координацијата на придружбата на танкерите со цел да се заштитат, би можела да трае со недели.

Додека западните сили се обидуваат да го стабилизираат пазарот, нема знаци за примирје на терен. Војната дополнително ескалираше откако Иран започна нови напади врз цели во Израел и Обединетите Арапски Емирати. Од друга страна, Израел и САД продолжуваат да напаѓаат стратешки цели во Исламската Република. 

Bloomberg Mercury

 

Особено загрижувачка е промената во воената доктрина на Иран. Техеран сигнализираше премин од претходните реципрочни контранапади кон стратегија на континуирани напади. Последиците од таквата одлука се веќе видливи, три брода беа погодени во стратешки важниот Ормуски теснец и Персискиот Залив, а пријавени се напади со беспилотни летала во близина на главниот аеродром во Дубаи, при што беа повредени четири лица.

Ормускиот Теснец дефинитивно не е прооден

Аналитичарите предупредуваат дека континуираната неизвесност во Ормускиот теснец, низ кој минува клучен дел од светските резерви на нафта, би можела да ги поништи напорите на МАЕ за стабилизирање на цените на глобално ниво.

Германскиот министер за надворешни работи Јохан Вадефул, којшто деновиве разговара со своите колеги од блискоисточните земји, во Катар изјави дека Ормускиот Теснец „дефинитивно не е прооден во моментов“.

„Нема движење на бродови и никој во регионот не се гледа себеси во позиција да обезбеди соодветна заштита“, рече тој. „Ова е аргумент повеќе во прилог на напорите за разговори и преговори, сѐ со цел војната да биде запрена. Блокадата на теснецот има катастрофален ефект врз енергетската сигурност и снабдувањето со енергенси, особено за Азија, со исто така голем ефект и врз европскиот пазар. Гледам само дипломатско решение за овој конфликт, а не воено“.