.webp){kind=icon}
Претседателот на Банката на федерални резерви (ФЕД) на Сент Луис, Џејмс Булард, рече дека креаторите на политиката веројатно ќе мора уште да ги зголемат каматните стапки за да ја смират инфлацијата, но додаде дека ќе почека да види што покажуваат податоците пред да одлучи каков потег ќе поддржи во јуни.
„Агресивната политика што ја водевме во последните 15 месеци го спречи растот на инфлацијата, но не е толку јасно дека сме на патот до остварување на посакуваните два отсто раст на цените“, им рече Булард на новинарите по вчерашниот настан во Минеаполис. Тој рече дека иако ќе ги проценува економските податоци што доаѓаат во наредниот период, сепак ќе треба да види значителни падови на инфлацијата за да биде убеден дека повисоки стапки не се неопходни.
Булард исто така рече дека, според него, американската централна банка сè уште може да постигне благо придвижување, со враќање на инфлацијата на целта на ФЕД од два отсто без да предизвика значителен економски пад.
„Да, економијата може да оди во рецесија, но тоа не е основниот случај. Мислам дека основниот случај е бавен раст, веројатно нешто помек пазар на трудот и опаѓање на инфлацијата“, рече тој, додавајќи дека не мисли дека е потребен пораст на невработеноста за да се намали инфлацијата.
Булард оваа година нема право на глас во Федералниот комитет за отворен пазар за одредување стапки. Тој рече и дека извештајот за работните места, објавен вчера, е посилен од очекуваното и истакна дека отворените работни места сè уште се многу повисоки отколку што беа пред пандемијата.
„Ова е многу тесен пазар на трудот. Ќе биде потребно некое време додека да се олади. Мислам дека треба да бидеме трпеливи и да го разбереме тоа“, рече тој. Податоците објавени вчера покажаа дека американските работодавци минатиот месец ги зголемиле новите работни места за неочекувано солидни 253.000 позиции. Со тоа, стапката на невработеност се врати на повеќедецениско ниско ниво од 3,4 отсто, а просечната заработка на час порасна за 4,4 проценти во однос на април минатата година.
Претставниците на ФЕД во средата ги зголемија стапките за четвртина поен, на целниот опсег меѓу 5 и 5,25 проценти, што е највисоко ниво од 2007 година, истовремено сигнализирајќи дека би можеле да паузираат со покачувањето на стапките на состанокот во јуни. Овој потег ја продолжи најагресивната кампања за затегнување во последните децении, додека американските централни банкари се борат против највисоките стапки на инфлација во последните неколку децении.
Ценовните притисоци се намалија од својот врв, но и натаму остануваат повеќе од двојно повисоки од целта на ФЕД. Булард рече дека го поддржува најновото зголемување на стапката на ФЕД. Тој покажа и намалена загриженост за неодамнешниот стрес во банкарскиот сектор, за кој рече дека може да се управува и не ѝ придава толку важност како другите на идејата дека превирањата во банките може да доведат до построги услови за кредити, што би ја забавило економијата.
„Не мислам дека ефектот сам по себе е доволно голем за да ја доведе економијата во рецесија“, рече тој.
Претседателот на ФЕД-Чикаго, Остан Гулсби, во интервју подоцна вчера за „Фокс њуз“ (Fox News) рече дека притисокот од банкарскиот сектор може да му наштети на растот и да ја намали потребата официјалните лица да продолжат да ги зголемуваат стапките.
„Знаеме дека условите за кредитирање, како тие што ги гледаме сега, во минатото биле во корелација со рецесии и кредитните кризи на некој начин ја извршуваа задачата на затегнување на монетарната политика“, рече тој. Гулсби, кој оваа година е гласач за политиката, рече дека мора да се следат податоците, бидејќи сега е прерано да се процени што треба да направи ФЕД за стапките кога ќе се состане на 13 и 14 јуни.
