Економијата на Саудиска Арабија се прошири со побавно темпо во првиот квартал од 2023 година бидејќи нафтениот сектор порасна со најниска стапка во повеќе од една година.
Бруто-домашниот производ (БДП) порасна за 3,9 отсто на годишно ниво во првите три месеци од годината, покажуваат прелиминарните податоци објавени од Генералниот завод за статистика. За споредба, во претходниот квартал растот на БДП беше 5,5 проценти.
Економската експанзија беше поттикната од зголемувањето на ненафтените активности за 5,8 отсто, кои беа моторот за отворање нови работни места, покажаа податоците објавени денеска. Растот на нафтените активности во првото тримесечје годинава изнесува само 1,3 отсто, за разлика од претходно, кога беше 6,1 отсто.
Меѓународниот монетарен фонд (ММФ) очекува саудиската економија да порасне за 3,1 отсто оваа година, што е значително забавување од 8,7 проценти, колку што забележа во 2022 година. ММФ предупреди дека Саудиска Арабија нема да може да го балансира својот буџет оваа година ако просечните цени на нафтата се под 80 долари за барел.
Де факто, владетелот на земјата, престолонаследникот Мохамед бин Салман, е на половина пат до остварување на својата визија вредна повеќе илјади милијарди долари за трансформација и диверзификација на економијата на најголемиот светски извозник на сурова нафта. Тоа е планот познат како „Визија 2030“.
Покрај брзото движење на ненафтените сектори, како туризмот, земјата сака да го зголеми уделот на приватниот сектор во економијата на 65 отсто од постојните ниски околу 40 проценти. Голем дел од оваа амбиција зависи од способноста на Саудиска Арабија да привлече странски инвестиции, што досега не ги исполни баш очекувањата. Тоа придонесува многу аналитичари да ги зголемат своите прогнози за цената на нафтата, бидејќи кралството мора да го балансира својот буџет додека продолжува да троши на расходи и проекти поврзани со „Визија 2030“.
.webp){kind=icon}
