Кризата што се развива околу горната граница на американскиот долг го натера претседателот Џо Бајден во вторникот да ги одложи плановите за посета на Папуа Нова Гвинеја и Австралија, скратувајќи го и претстојното патување во Азија, со цел да може да се врати побрзо во Вашингтон.
Бајден сепак ќе биде во Хирошима в среда, за да присуствува на тридневниот самит на Г7. По тоа, тој требаше да биде првиот американски претседател што ќе ја посети Папуа Нова Гвинеја. Во главниот град на земјата, Порт Морезби, тој требаше да присуствува на потпишување нов стратегиски договор со Микронезија и да се сретне со лидерите на 18 острови во Пацификот.
Во Сиднеј, Бајден планираше да присуствува на состанокот на групата „Квад“ (Quad), составена од САД, Јапонија, Австралија и Индија. Групата е основана со цел да му се спротивстави на зголеменото влијание на Кина во Индопацифичкиот Регион.
Прочитај повеќе
Јелен: Зголемувањето на долгот е единствениот добар исход за САД
Mинистерката за финансии на САД изјави дека единствениот добар исход во тековниот застој во однос на американскиот долг е Конгресот да ја зголеми границата.
12.05.2023
Ако САД не го подигнат лимитот за задолжување, под закана е националната безбедност
Американската министерка за финансии Џенет Јелен повторно зборуваше за неуспехот на сојузната влада да ги реализира своите давачки.
11.05.2023
Неплаќањето не е опција
Бајден им соопшти на новинарите дека телефонски разговарал со австралискиот премиер Ентони Албанезе за да ја објасни својата одлука. „Неисплаќањето на долгот едноставно не е опција“, рече Бајден, кој разговара со републиканците во Конгресот.
Портпаролот на Белата куќа, Џон Кирби, рече дека Бајден ќе може да се сретне со Албанезе и индискиот премиер Нарендра Моди додека е во Хирошима. Таму се планирани средби и со лидерите на Јапонија и Јужна Кореја. Тимот на Бајден разговарал и со лидерите на Папуа Нова Гвинеја за да ги информира за неговата одлука, соопшти Белата куќа. Амбасадата на Папуа Нова Гвинеја не одговори веднаш на барањето за коментар за одложувањето.
Албанезе во изјава рече дека Бајден се извинил што не може да ја посети Австралија и дека ќе се обиде да оди во Австралија во првата пригода. Тој исто така рече дека ќе го посети Вашингтон подоцна оваа година, во државна посета на САД.
Американското министерство за финансии процени дека САД нема да бидат во можност да ги реализираат своите давачки веќе на 1 јуни, доколку Конгресот не го подигне плафонот на долгот.
Грегори Полинг, експерт за Азија во Центарот за стратегиски и меѓународни студии во Вашингтон, рече дека откажувањето на патувањето на Бајден ќе биде удар за Папуа Нова Гвинеја и напорите на Бајден да ја придобие островската држава на Тихи Океан во услови на зголемена конкуренција од Кина.
„Сигурен сум дека Белата куќа ќе најде начин да им го надомести тоа на партнерите на краток рок. Но, тоа е дополнителен доказ дека домашната нефункционалност на САД нè слабее во странство“, посочи тој.
.webp){kind=icon}