.webp){kind=icon}
Цените на оризот во Азија се искачија на највисоко ниво по повеќе од две години, поради страв на увозниците дека со почетокот на феноменот „Ел Нињо„(El Ninjo) ќе се исушат насадите и ќе се уништат посевите. Референтната цена на оризот во регионот, тајландскиот бел ориз, се зголеми за 15 отсто во изминатите четири месеци на 535 долари што е највисок раст регистиран од почетокот на март 2021 година според податоците на Асоцијацијата на извозници на ориз во Тајланд.
Според последните податоци на Светската метеоролошка организација, за прв пат по седум години се развиле услови за појава на феноменот „Ел Нињо„(El Ninjo) во тропскиот Пацифик, што е директна закана од појава на суша во Југоисточна Азија. Тридневните рекордни глобални температури претходната недела ја зголемија загриженоста од темпото на климатските промени. Додека монсунските дождови помогнаа за оризовите полиња во Индија, која е најголем извозник, сушата ги загрозува посевите на Тајланд. Поради алармот дека следната година сушата ќе биде широко распространета, Владата на оваа земја веќе побара од земјоделците да го ограничат садењето на само една култура.
„Со Ел Нињо, ќе почнеме јасно да ги гледаме ефектите од сувото време подоцна околу септември и октомври“, рече Чукиат Офасвонгсе, претседател на Здружението на извозници на ориз во Тајланд.
Увозниците почнаа да прават залихи во големи количини. Виетнам очекува извозот на ориз да се зголеми на највисоко ниво во последната деценија оваа година, со зголемени испораки до купувачите на Филипините, Кина и Индонезија.
„Големото купување од Индонезија и Филипините ја зголеми цената на оризот на пазарот“, рече Џереми Цвингер, основач и главен извршен директор на истражувачката компанија „Рајс Трејдер“ (The Rice Trader). Додека светските резерви паднаа на најниско ниво во претходните две години, според американското Министерство за земјоделство, оваа година залихите се на рекордно високо ниво.
Топлотните бранови најверојатно ќе продолжат во многу области и во јужна Кина во следните неколку дена, а температурите ќе достигнат до 40 степени во делови на Хунан и Џиангкси, водечките провинции за одгледување ориз, соопшти кинеската метеоролошка управа. Постои голем ризик дека топлината ќе принуди дел од оризот во овие области да созрее предвреме.
