.webp){kind=icon}
Кина ќе ги укине царините за антидампинг и антисубвенционирање на австралискиот јачмен, што стапува во сила од 5 август, се наведува во соопштението на кинеското министерство за трговија, како најнов знак за подобрување на врските меѓу двете земји. Кина во мај 2020 година воведе царини од над 80 отсто на австралискиот јачмен, обвинувајќи ги австралиските извозници за дампинг на кинескиот пазар, односно дека јачменот увезен во Кина е по цена под нормалната, што предизвикува штетен ефект врз економијата. Потегот дојде откако се нарушија билатералните врски бидејќи тогашниот премиер Скот Морисон повика на меѓународна истрага за потеклото на ковид-19. Но, по изборот на лабуристичката влада во мај 2022 година, комуникацијата меѓу Канбера и Пекинг се обнови и односите значително се подобрија. „Со оглед на промените на пазарот на јачмен во Кина, повеќе не е неопходно да се продолжи со наметнување антидампинг-давачки за увезениот јачмен од Австралија“, соопшти кинеското министерство за трговија.
Bloomberg Mercury
Вредноста на извозот на австралиски јачмен во Кина годишно изнесуваше во просек околу 1,2 милијарда австралиски долари (790 милиони американски долари) помеѓу 2014-2015 и 2018-2019 година, според процените на владата на Канбера.
Во април Пекинг објави дека ќе одржи тримесечен преглед на царините за јачменот, во замена Канбера да го прекине својот случај против Кина во Светската трговска организација. Австралија очекува да следува сличен процес за отстранување на кинеските давачки за виното во земјата, соопшти владата во петокот. Акциите на „Трежр вајн“ (Treasury Wine Estates Ltd) скокнаа за цели 3,9 отсто, најмногу од 11 април. Лозарите во земјата побараа нови купувачи на австралиското вино откако Кина во 2020 година воведе високи царини за извозот на вино од Австралија, уништувајќи го некогаш најпрофитабилниот пазар. Официјални лица во Кина тогаш тврдеа дека некои австралиски вина во оваа земја се продаваат по цена што не ги покрива трошоците за производство (дампинг) благодарение на субвенциите.
