.webp){kind=icon}
Американскиот претседател Џо Бајден повика на зголемени царини за кинескиот челик и алуминиум во обид да го зајакне американскиот челичен сектор и да им се додвори на работниците во годината на претседателски избори во САД.
При посетата на Питсбург в среда, Бајден ќе предложи нови царини - до 25 проценти - за одредени кинески производи од челик и алуминиум како дел од тековната ревизија, додека САД исто така ќе започнат формална истрага за кинеската индустрија за бродоградба. В среда Бајден уште еднаш ќе посочи дека компанијата „Јунајтед Стејтс стил“ (United States Steel Corp.) треба да остане во американска сопственост.
Овие потези, сепак, целат на релативно мал сегмент од американскиот пазар, со увоз на кинески челик и алуминиум во вкупна вредност од околу 1,7 милијарда долари во 2023 година. Но американските власти велат дека најавите се дизајнирани да го спречат очекуваниот пораст (на увозот) и да го заштитат американскиот пазар.
Qilai Shen/Bloomberg
„Претседателот разбира дека треба да инвестираме во американското производство, но исто така треба да ги заштитиме тие инвестиции и тие работници од нефер извоз, поврзан со прекумерниот кинески индустриски капацитет“, изјави за новинарите Лаел Брејнард, директор на Националниот економски совет.
Бајден главно ги задржа тарифите за Кина наметнати од поранешниот американски претседател Доналд Трамп, а неговата администрација продолжува со понатамошна ревизија. Бајден планира да разговара со 200 члена на синдикатот во седиштето на „Јунајтед стилворкерс“ (United Steelworkers), што е многу симболично, бидејќи синдикатот предводи опозиција против купувањето на „Јунајтед Стејтс стил“ од 14,1 милијарди долари. Таа компанија треба да ја преземе јапонскиот производител на челик „Нипон стил“ (Nippon Steel Corp).
Американскиот претседател в среда повика на зголемување на тарифите според членот 301 од Законот за трговија, кој опфаќа широк спектар на кинески челик и алуминиум - имено, производите што подлежат на царини од 0 проценти или 7,5 проценти треба да подлежат на тарифи повисоки од 25 проценти. Стапките на производите што веќе подлежат на царина од 25 отсто нема да се менуваат.
Конечната одлука е на Кетрин Таи, трговската претставничка на САД, и ќе дојде кога ќе се заврши тековната ревизија на тарифите од членот 301, рече официјален претставник запознаен со плановите, кој сакаше да остане анонимен. „Администрацијата се надева дека наскоро ќе види резултати“, рече тој.
Увозот од Кина со години е неекономичен за домашните купувачи. Комбинацијата од сегашните тарифи од членот 301, царините од членот 232 од времето на Трамп и другите постојни антидампинг и компензаторни давачки ефективно го елиминираа кинескиот увоз на челик и алуминиум.
Увозот на челик од Кина достигна речиси три милиони тони во 2014 година, покажуваат податоците на Бирото за попис на САД. Но САД увезоа само 600.000 метрички тони челик во 2023 година, во вредност од 900 милиони долари, од вкупниот американски увоз на челик од 25,6 милиони тони. Американскиот увоз на кинески алуминиум изнесуваше 200.000 метрички тони во вредност од 750 милиони долари, од вкупниот увоз од 5,46 милиони тони.
Канцеларијата на Кетрин Таи исто така започнува формална ревизија на кинеските сектори за транспорт, логистика и бродоградба, истрага побарана од група од пет големи синдикати минатиот месец.
