Европската унија размислува за рестартирање на постапката пред Светската трговска организација (WTO, World Trade Organization) против Соединетите Американски Држави во спорот за челик и алуминиум.
Но, што е уште поважно, без оглед на спорот, ЕУ засега ќе продолжи да се воздржува од воведување реципрочни царини за американските стоки, а со тоа ќе ја препознае предноста на Вашингтон во клучната точка на преговорите, велат извори запознаени со дискусијата.
Со рестартирање на постапките пред WTO, Европската унија ја остава отворена вратата за воведување царини во иднина, но истовремено ја продолжува и важноста на договорот со кој се избегнува враќање на царините следниот месец за стоки вредни милијарди долари. Брисел допрва треба да донесе конечна одлука, велат истите извори кои се согласиле да дадат изјава под услов да останат анонимни.
„Блумберг“ претходно објави дека ЕУ се спротивставува на воведувањето царини за САД, бидејќи стравува дека овој потег може дополнително да го фаворизира Трамп во пресрет на изборите во ноември следната година. ЕУ и САД интензивно преговараат со месеци за изнаоѓање решение за спорот.
Портпаролите на Европската комисија, извршното тело на ЕУ, не одговорија веднаш на барањето за коментар.
Трговскиот конфликт започна кога поранешниот претседател Доналд Трамп воведе царини за европскиот челик и алуминиум, наведувајќи ја националната безбедност како причина, што ја поттикна ЕУ да возврати со слични сопствени мерки. Во 2021 година, комисијата се согласи на привремено примирје со владата на претседателот Џо Бајден.
ЕУ и САД си дадоа рок од две години да постигнат т.н Глобален договор за одржливи челик и алуминиум кој ќе стави крај и на спорот и на царините. Доколку двете страни не постигнат договор, царините би можеле да се вратат следната година.
Како дел од примирјето од 2021 година, САД делумно ја укинаа својата мерка со воведување квоти над кои важат царините за металите. За возврат, ЕУ ги замрзна сите свои реципрочни мерки. Во ЕУ сметаат дека тоа создало дисбаланс поради кој извозниците од Унијата плаќаат царини од над 350 милиони долари годишно.
Бидејќи преговорите за Глобалниот договор се во ќорсокак, двата сојузника сега разговараат за продолжување на условите на примирјето. САД сакаат статусот кво да продолжи и по изборите во САД до крајот на 2025 година. ЕУ бара замена на сегашниот систем на квоти - кој се состои од десетици квартални квоти поврзани со различни категории на челик - со годишни квоти кои подобро би ја одразувале историската размена на стоки.
Администрацијата на Бајден досега го отфрлаше таковото барање, велат изворите. Но, многу земји-членки на ЕУ не се подготвени да одговорат на тоа одбивање со повторно воведување царини за некои стоки од САД, бидејќи стравуваат дека таквиот одговор може да ги подобри шансите на Трамп на изборите следната година, напиша претходно „Блумберг“. САД сепак би можеле да се согласат на некои помали отстапки.
„ЕУ би можела да издржи и да извлече дополнителни отстапки од САД за примената на квотите, но тоа би вклучувало одолговлекување на случајот до крајот на годината, а релативно е општо познато дека земјите-членки не сакаат повторно активирање на царините“, коментира Сем Лоу, партнер во меѓународната консултантска компанија „Флинт Глобал“ (Flint Global).
.webp){kind=icon}
