Претставниците на Федералните резерви (Фед) минатиот месец се согласија дека би било соодветно „извесно време“ да се задржи рестриктивната политика и посочија дека најверојатно е достигнат врвот во зголемување на каматните стапки односно дека ќе почнат да ги намалуваат во 2024 година.
„Членовите сметаат дека каматната стапка најверојатно е на или блиску до нејзиниот врв во овој циклус“, се вели во записникот од декемврискиот состанок на Федералниот комитет за отворен пазар (FOMC), објавен во средата.
Покрај тоа, официјалните лица „повторно потврдија дека би било соодветно политиката да остане рестриктивна некое време додека не стане очигледно дека инфлацијата е одржливо на пониско ниво“.
Записникот укажува на зголемен оптимизам кај учесниците во однос на насоката на инфлацијата, истакнувајќи дека е постигнат „јасен напредок“. Комитетот изразува подготвеност да ја намали референтната каматна стапка во 2024 година, доколку ваквиот тренд продолжи, иако во моментов е неизвесно кога тоа би можело да се случи.
„Речиси сите учесници во своите проекции укажуваат дека, поради подобрувањето на изгледите за инфлацијата, нивните основни проекции би имплицирале дека понизок целен опсег за федералните средства би бил соодветен до крајот на 2024 година“, стои во записникот.
На декемврискиот состанок централните банкари едногласно донесоа одлука референтната каматна стапка да се задржи на исто ниво во опсег од 5,25 до 5,5 отсто, трет пат по ред. Иако изјавата на FOMC ја остави отворена можноста за уште едно зголемување, прогнозите на официјалните лица укажуваат на крај на најагресивното зголемување на стапката во една генерација.
Кварталните проекции сугерираат три намалувања на каматните стапки во 2024 година, или околу 75 базични поени. Ажурираните изгледи, заедно со коментарите на претседателот на Фед, Џером Пауел по состанокот во декември, ги поттикнаа акциите и обврзниците, носејќи општо олеснување на финансиските услови.
.webp){kind=icon}