text size
Властите во Венецуела подготвија писма кои, според нивните тврдења, се потпишани од кралицата Елизабета Втора за да го поткрепат своето барање за златото во вредност од повеќе од милијарда долари складирано во Банката на Англија (БОА).
Дипломатската кореспонденција е доказ дека Обединетото Кралство го признава Николас Мадуро за претседател на Венецуела, изјави Каликсто Ортега, шеф на венецуелската централна банка.
„Ова ја поткопува пресудата на судијата во Лондон минатиот месец со која ѝ се ускрати контролата на администрацијата на Мадуро врз златото“, рече Ортега во четвртокот, во едно од неговиоте ретки интервјуа. „Издавањето визи од Обединетото Кралство за службеници на Мадуро, исто така, го зајакнува тврдењето на владата“, додаде тој.
Опозиционерот Хуан Гваидо, исто така, се обидува да воспостави контрола над златото во долготрајната правна битка, откако Обединетото Кралство го призна за претседател на Венецуела во 2019 година. Владата на Мадуро соопшти дека ќе поднесе жалба на најновата судска одлука.
„Три писма потпишани од кралицата застапуваат официјална позиција“, рече Ортега во Париз, додека се враќаше кон Каракас од Лондон, каде што разговараше за ова прашање со своите адвокати.
Bloomberg
Министерството за надворешни работи на Обединетото Кралство веднаш не одговорило на барањето за коментар во однос на ситуацијата.
Златото, кое се чува во трезорите на Банката на Англија (БОА), претставува околу една петтина од меѓународните резерви на Венецуела од 5,2 милијарди долари, со исклучок на специјалните права на повлекување со Меѓународниот монетарен фонд до кои земјата моментално не може да пристапи.
Бидејќи се очекуваат дополнителни правни расправии, ниту владата на Мадуро, ниту Гваидо и неговите сојузници веројатно нема да добијат контрола врз имотот во блиска иднина.
Карипските острови
Ортега претстави пред Bloomberg News две писма потпишани од Елизабета Втора во јуни, во својство на кралица на Свети Винсент и Гренадини.
Во првото писмо таа го известува за промена на претставникот на карипската нација со седиште во Каракас, додека во второто бара Мадуро да акредитира нов.
Во друго писмо, кралицата му пишува на Мадуро во име на владата на Света Луција. Сите три писма се упатени до „Неговата екселенција Николас Мадуро Морос, претседател на Боливарската Република Венецуела“.
Bloomberg
Писмата му биле врачени на Ортега од Министерството за надворешни работи на Венецуела, објасни тој.
Кралицата Елизабета е шеф на државата на неколку карипски нации, кои се независни од Лондон и водат своја надворешна политика.
Правна стратегија
Адвокатскиот тим на Ортега треба да одлучи за својата нова стратегија во текот на следната недела додека ја подготвува жалбата.
Обидот да се вклучат писмата како нов доказ може да придонесе случајот да се одолговлекува уште повеќе, смета Ортега.
Владата на Мадуро смета дека одлуката на судот има огромни последици за другите земји со средства во финансискиот систем на ОК.
„Овде е во прашање угледот на Лондон како најнеутрално и најсигурно место за водење бизнис ширум светот“, рече Ортега. „Тие нешто кажуваат на суд, а според фактите поинаку се однесуваат“, изјави тој.
Ортега, исто така, го предочи својот сопствен дипломатски пасош, со печат со осум визи издадени од властите на ОК од јуни 2018 година, како доказ дека владата во Лондон ги признава функционерите на Мадуро како легитимни.
.webp){kind=icon}
