Австралија ќе им забрани на странците да купуваат куќи бидејќи трошоците растат

Австралиската влада ќе им забрани на странските инвеститори да купуваат изградени куќи во следните две години, како дел од изборното ветување за справување со зголемените цени на објектите за домување. Од 1 април, на странските инвеститори ќе им биде забрането да купуваат веќе изградени имоти до 31 март 2027 година, изјави во неделата министерката за домување Клер О’Нил. Ограничувањето потоа ќе се разгледа за да се утврди дали треба да продолжи.

Домовите во Австралија се едни од најнедостапните во светот и зголемените цени на имотот ќе бидат клучно изборно прашање во услови на поширока криза на трошоците за живот, особено меѓу младите гласачи кои се плашат дека никогаш нема да можат да купат дом.

Во Сиднеј, вредноста на домувањето скокна за речиси 70 проценти во текот на изминатите 10 години, при што просечната цена на живеалиштето сега е околу 1,2 милиони австралиски долари (762.000 долари), според консултантската куќа за имот „Корлоџик“ (CoreLogic Inc.)

Сепак, забраната веројатно ќе има само маргинален ефект врз цените. Странски инвеститори купиле станбен недвижен имот во вредност од 4,9 милијарди австралиски долари - вклучувајќи празно земјиште, нови и изградени станови - во 12-те месеци, заклучно со 30 јуни 2023 година, според Австралиската даночна канцеларија. Изградените станови сочинуваа околу една третина од вкупниот број.

На даночната канцеларија ќе и бидат дадени дополнителни средства за да помогне во спроведувањето на забраната, рече О’Нил во неделата.

Потегот на владата да забрани странски купувања на изградени куќи се совпаѓа со ветувањето на опозицискиот лидер Питер Датон дадено минатата година. Изборите мора да се одржат до 17 мај, а анкетите покажуваат дека тоа ќе биде тесна борба, со загриженоста за трошоците на животот и домувањето меѓу првите три прашања.

Во моментов нема коментари за веста. Биди прв да коментира...

Остави коментар