Австралијците можат да ги игнорираат деловните повици и мејлови по работното време

Австралијците сега можат легално да ги игнорираат неразумните повици од работа и мејл-пораките по завршувањето на работното време според новото владино законодавство, кое стапи во сила денеска, предизвикувајќи критики од деловните групи.

Според законите, работодавците се соочуваат со казни до 93.000 австралиски долари (63.000 американски долари) за стапување во контакт со вработен од несуштински причини надвор од работното време.

„Како што луѓето не добиваат плата 24 часа на ден така тие не мора да работат 24 часа на ден“, изјави премиерот Ентони Албанес за „Аустралијан бродкастинг“ (Australian Broadcasting Corp.), додавајќи дека очекува промените да ја зголемат продуктивноста.

„За многу Австралијци мислам дека е фрустрирачки што се очекува да бидат покрај нивните телефони и нивната е-пошта по 24 часа на ден“, рече тој. „Искрено, тоа е проблем за менталното здравје“.

Австралија ги следи нациите како Франција, Шпанија и Белгија во воведувањето на законите за право на исклучување за да се заштитат работниците од неразумен контакт надвор од работното време, додека другите влади низ светот размислуваат за слични мерки.

Локалните деловни групи веќе изразија загриженост за новите закони. Ендрју Меккелар, главен извршен директор на Австралиската трговска и индустриска комора, ги опиша промените како „меур на мислите“ и рече дека бизнисот не бил консултиран за нив.

„Какви било спорови околу обидите на работодавците да контактираат со работниците надвор од работното време може да се ескалираат до австралискиот суд за индустриски односи и до комисијата за фер работа за конечна одлука“, изјави министерот за односи на работното место Мареј Ват.

Сепак, тој додаде дека се надева дека работодавците и вработените ќе можат да ги решат сите спорови преку дискусии, без потреба од ескалација.

Правото на исклучување за вработените од средните и големите претпријатија ќе важи веднаш, додека малите бизниси ќе имаат 12 месеци пред да бидат вклучени и нивните работници, велат од Владата.

Во моментов нема коментари за веста. Биди прв да коментира...

Остави коментар