Светот се менува, македонските работници заглавени меѓу денес и утре

Вештачката интелигенција значително ги забрза промените на пазарот на трудот, а работниците веќе го чувствуваат тоа, покажува најновото глобално истражување за надежите и стравовите на работната сила на „Прајсвотерхаускуперс“ (ПвЦ - PwC).

Истражувањето дава мешана слика. Повеќе од половина од работниците чувствуваат дека премногу промени им се случуваат одеднаш на работните места, а 44 отсто не разбираат зошто работите треба да се променат баш сега.

Другата половина работници велат дека се подготвени да се приспособат на новите начини на работа. Многумина се желни да учат. Повеќе од половина се оптимисти за иднината на нивната компанија.

Оттука, ова истражување, кое е спроведено меѓу повеќе од 56.000 работници во 50 земји и региони, заклучува дека работната сила е заглавена меѓу денес и утре. Клучна улога за прифаќање на промените ќе имаат менаџерите. За нив, промените што ги носи вештачката интелигенција се важни затоа што ќе донесат одржливост на бизнисите на долг рок. Но, ако вработените не ги разбираат плановите за трансформација, веројатно нема да успеат.

Промените се чувствуваат и во македонскиот ИКТ-сектор

Анкетата на „Прајсвотерхаускуперс“ покажува дека третина од работниците веќе почувствувале значителна промена на работното место во последните 12 месеци. Промените се однесуваат на обемот на работа, на односите со тимот, на структурата на тимот.

Малку вакви истражувања има во земјава. Едно истражување е спроведено на територијата на општина Центар од страна на Институтот за дигитализација, економија и иновации.

Тоа покажа дека 24,6 отсто од бизнисите лоцирани таму користеле некаков тип ВИ-алатка, од кои преовладуваат алатките што се користат за административно работење и маркетинг-цели, додека помал дел користи ВИ-алатки за помош при програмирањето. Најголем дел од компаниите што користат ВИ се мали компании, кои имаат до десет вработени.

Во ИТ-секторот употребата е позначителна. Дури третина од ИТ-професионалците користат вештачка интелигенција на дневна основа, покажува истражувањето спроведено меѓу 2.237 лица од страна на „ИТ.мк“.

Третина од ИТ-професионалците не се плашат дека ќе бидат заменети од ВИ

Кога станува збор за продуктивноста, над половина од испитаниците забележале подобрување.

Но анкетата покажува дека се води мртва трка меѓу оние ИТ-професионалци што се возбудени и оптимисти и оние што се индиферентни, па дури и нервозни поради вештачката интелигенција.

Во однос на очекувањата за тоа како вештачката интелигенција ќе се одрази на работните места, македонските ИТ-професионалци се оптимисти. Близу третина од нив мислат дека ВИ не може да ги замени.