Германија почнува да ја тестира четиридневната работна недела

Германскиот обид за заживување на економската активност има и експериментална димензија, бидејќи некои компании решија да тестираат пократко работно време.

На првиот ден од февруари ќе започнат со шестмесечна програма во која вработените ќе имаат по плус еден слободен ден неделно за непроменета плата. Целта на оваа програма е да се утврди дали ваквиот начин на работа ги прави вработените посреќни, но и попродуктивни...

„Апсолутно сум убеден дека вреди да се инвестира во новиот начин на работа бидејќи ја зголемува мотивацијата и создава добро чувство, што на крајот ја зголемува ефикасноста. Ако четиридневната работна недела се покаже функционална, нема да не чини ништо на долг рок“, смета Сорен Фрике, соосновач на компанијата за организирање настани „Солидсенс“ (Solidsense), која е една од 45-те компании кои учествуваат во програмата.

Овој проект ги одразува подлабоките промени на германскиот пазар на труд, каде што недостатокот на квалификувана работна сила врши притисок врз компаниите. Тој недостаток, заедно со инфлацијата, ги охрабри вработените да бараат повисоки плати и да ја зачуваат флексибилноста и независноста што ги стекнаа за време на пандемијата.

Но, нерамнотежата, исто така, ги подгрева тензиите меѓу работодавците и вработените. Машиновозачите се во шестдневен штрајк барајќи „Дојче бан“ да ја намали работната недела на 35 од 38 часа со задржување на платата. Синдикатот на градежните работници бара зголемување на платите за повеќе од 20 отсто за многу од 930.000 луѓе во секторот, што според некои економисти може дополнително да ја поттикне инфлацијата.

Bloomberg Mercury

Покрај тоа што, според минатогодишно истражување, половина од германските компании имаат проблем да најдат адекватни луѓе, повеќе од седум милиони Германци ќе заминат во пензија до 2035 година, а наталитетот и имиграцијата не ја надоместуваат оваа загуба на работна сила.

„Може да се позиционираме како модерна компанија или може да кажеме дека сите треба да работат повеќе, но во одреден момент нема да остане никој кој ќе може да работи за мене“, вели Хенинг Ропер, директор во „Еуролам“ (Eurolam), производител на прозорци кој исто така учествува во програмата за намалена работна недела.

Според новозеландската непрофитна организација „4 деј вик глобал“ (4 Day Week Global), која ја води програмата, продуктивноста, и покрај пократката недела и истата плата, треба да остане иста или да се зголеми. Дополнителна придобивка за компаниите би било намалувањето на боледувањето поради стрес, болест или замор.

Во 2022 година, во просек, Германците не можеле да работат 21,3 дена, што резултирало со трошок од 207 милијарди евра.

Сепак, економистот од Институтот за истражување на пазарот на труд во Нирнберг, Енцо Вебер, смета дека Германија не инвестира доволно во иновации и дигитализација, што го ограничува растот на продуктивноста. Тој посочува дека без овие инвестиции пократка работна недела нема да донесе значителен раст.

Мартин Адемер, аналитичар за „Блумберг економикс“, вели дека четиридневната работна недела може да ја зголеми продуктивноста по час, но таквиот раст на продуктивноста тешко може да го компензира намалениот број часови. Според него, оваа промена со намалување на расположливата работна сила би била главната пречка за економскиот раст.

Ниту министерот за финансии Кристијан Линднер не е задоволен од идејата за четиридневна работна недела, кој исто така смета дека тоа е закана за економскиот раст.

Слични проекти во САД, Канада и Велика Британија покажаа дека придобивките се видливи, според „4 деј вик глобал“. Во Британија, на пример, бројот на денови поминати на боледување падна за 65 отсто.

Bloomberg Mercury

„Ако имам премногу време, се стремам кон перфекционизам, а тоа не е секогаш неопходно. Истиот резултат можете да го добиете со помалку часови“, вели дизајнерката на корисничко искуство во „Силидсенс“, Јасмин Гале.

Во 2022 година, Белгија стана првата земја во Европа која понуди опција за четиридневна работна недела со ист број работни часови.

Јапонија, исто така, ги охрабрува компаниите да се одлучат за пократка работна недела за луѓето да имаат повеќе слободно време и повеќе деца, што потоа има позитивен ефект врз целата економија.

Јан Бурен, соосновач на берлинската консултантска компанија „Интрапренор“ (Intraprenör), смета дека компаниите мора да покажат флексибилност и креативност.

„Се разбира, четиридневната работна недела не секогаш функционира за секого. Треба да можете да процените каде функционира, а каде не“.

 

Во моментов нема коментари за веста. Биди прв да коментира...

Остави коментар