Малите бизниси предводници во четиридневната работна недела

Во транзицијата кон четиридневната работна недела се појави сигурен шампион - малите бизниси.

Податоците објавени во вторникот од софтверската компанија „Густо“ (Gusto) покажуваат дека речиси четвртина од малите бизниси специјализирани за технологија и професионални услуги нудат четиридневен распоред или размислуваат да го воведат.

„Компаниите во кои се работи од далечина го решаваат прашањето за флексибилност на сосема нов начин“, вели Лиз Вилке, главна економистка во „Густо“. Таа ги посочува малите компании како „сфера за тест“ на различни видови невообичаени работни распореди.

Способноста да им се понуди флексибилност на работното место на вработените не е само луксуз за малите бизниси. „Тоа се тестира во канцеларии што се толку мали што лошите перформанси на еден вработен може да влијаат на севкупниот резултат“, посочува Вилке. Со зголемениот притисок да се вратат во канцеларија и турбулентниот пазар на трудот, што придонесува за стапка на исцрпеност до 40 отсто кај канцелариските работници, малите бизниси користат олабавени работни правила за да ја зголемат продуктивноста.

„Малите бизниси навистина ја користат флексибилноста како начин да ги одржат луѓето на најдобро ниво“, рече Вилке, која додава дека автономијата може да има многу форми, вклучувајќи и дозволување на вработените да изберат кога и каде ќе работат.

Уште позабележително, 40 отсто од малите бизниси што постојано работат од далечина посочиле дека се „далеку над просекот“ во градењето лични врски меѓу работниците, додека само 33 отсто од компаниите со целосно присуство и 24 отсто од оние со  хибриден режим на работа пријавиле такви резултати.

Поголеми фирми се обидоа да ја усогласат слободата на движење што ја уживаат вработените во малите бизниси преку воведување недели за „работа од каде било“, каде што се одвојува одредено време  - обично од две до четири недели - за вработените да работат од локација по избор. Оваа практика е само ехо на поволностите што се широко понудени од малите бизниси, кои постојано работат од далечина, при што секоја петта фирма пријавила вработен што работи надвор од земјата. Малите бизниси се исто така помалку склони да поставуваат стапки на плати врз основа на локацијата - дури и кога вработуваат на меѓународно ниво.

Како што поголемите компании продолжуваат да ги заоструваат своите прописи за враќање во канцеларија, уникатната флексибилност што ја нудат малите бизниси може да станува сè попривлечна за оние што бараат работа.

Малите компании што стартувале во последните три години често го имаат ова ниво на флексибилност - 47 отсто се хибридни, а 31 отсто се целосно на далечина. Шансите се дека претпријатијата во иднина ќе се организираат околу скратената работна недела при лансирањето наместо ретроактивно да се приспособуваат на тоа.

„Мило ми е што конечно ја надминуваме дискусијата дали да понудиме далечинска и хибридна работа“, рече Вилке. „И конечно влегуваме во интересниот простор за тоа како да работиме од далечина и во хибриден режим“.

Во моментов нема коментари за веста. Биди прв да коментира...

Остави коментар