Четиридневната работна недела води до поголема ефикасност, велат експерти

Зголемувањето на флексибилноста на работното место преку промени како што е четиридневната работна недела може да ја зголеми продуктивноста и да го смени растечкиот феномен на исцрпеност, беше пораката од панелот на експерти одржан за време на овонеделниот Светски економски форум во Давос.

Идејата за пократка работна недела доби на интензитет од почетокот на пандемијата и целосно го промени начинот на кој се организира работата, уверувајќи многу луѓе дека различните начини на извршување на работата можат да го подобрат квалитетот на живот.

Студијата спроведена од непрофитната организација „Фор деј вик глобал“ (4 Day Week Global), во која беа вклучени десетици компании, покажа намалување на стресот и анксиозноста, како и подобрувања во ефикасноста и приходите, рече Адам Грант, кој е организациски психолог на Универзитетот во Пенсилванија.

Тој додаде дека луѓето повеќе вежбаат и подобро спијат.

„Ние брзаме низ општество склоно да исцрпува. Тоа го видовме за време на ковид-19, иако започна порано. Присутно е и преку социјалните мрежи, преку културата на постојана поврзаност што ја имаме сега“, рече холандската министерка за труд, Кариен ван Генип, на панелот во Давос.

Depositphotos

Таа додаде дека флексибилноста е еден од одговорите за психолошките тешкотии. Ова би можело да вклучува забавување на нашите кариери за да можеме да работиме помалку неколку години и да се грижиме за малите деца или постарите родители, пред повторно да го забрзаме темпото.

Министерката верува дека четиридневната работна недела може да им помогне на жените, кои често работат два или три дена, да станат финансиски понезависни и да ги поттикне мажите да помагаат повеќе.

Главниот извршен директор на „Рандстад“ (Randstad NV), Сандер ван 'т Норденде, верува дека е „деловен императив“ на вработените да им се понудат опции како што е четиридневна работна недела.

„Зошто? Затоа што нема премногу таленти и оние кои се на располагање треба да се третираат како клиенти. Луѓето имаат избор“, рече тој.

Истакна дека 50 отсто од луѓето се подготвени да се откажат доколку не се задоволни со својата работа.

„Балансот помеѓу работата и слободното време е клучно нешто што луѓето го сакаат. Светот на бизнисот треба да го поддржи ова“, истакнува Ван'т Норденде.

Според Генип, во време кога светот се соочува со климатски промени, транзиција кон чиста енергија и грижа за стареењето на населението, скратувањето на традиционалната работна недела може да биде успешно само доколку се зголеми продуктивноста.

Bloomberg

„Цврсто верувам дека кога имате повеќе слободно време, станувате попродуктивни за време на работата. Ова бара инвестирање во луѓе и технологии, како и промена на деловната култура“, вели таа.

Сепак, не секој сака пократка работна недела, забележува Кристи Хофман, генерална секретарка на глобалната синдикална конфедерација „Уни глобал“ (UNI Global Union).

Таа вели дека некои вработени, на пример, повеќе би сакале да имаат петдневна работна недела и шест слободни дена годишно.

Посочи дека зголемениот надзор поврзан со работата од дома предизвика незадоволство кај вработените во канцелариите и дека „правото на исклучување е навистина важно“.

Во моментов нема коментари за веста. Биди прв да коментира...

Остави коментар