Успешно прво полугодие за „Витаминка“, цената на какаото останува предизвик

Во првата половина од годината „Витаминка“ ги зголеми вкупните приходи за 12 отсто, покажуваа финансискиот извештај. Во структурата на вкупните приходи најголемо учество, 99 отсто, имаат приходите остварени од продажба на производи и услуги од основна дејност, кои во споредба со остварените во 2024 година се повисоки за 12 отсто. Растот на приходите е поради зголемената продажба на одредени групи на производи.

Остварените единечни вкупни расходи во првото полугодие од 2025 година изнесуваат 1,853,139 илјади денари и во споредба со остварените за истиот период во 2024 година бележат зголемување од 15 отсто. Висината на вкупните расходи е во корелација со работењето за 2025 година.

„Во извештајниот период е остварена добивка по оданочување во висина од 26,069 илјади денари, која во споредба со добивката за истиот период од минатата година е зголемена за 7 отсто“, наведува компанијата.

Работењето и натаму се одвива во отежнати и нестабилни макроекономски услови, исто како и во претходните години.

„Секако безбедносните глобални кризи го отежнуваат економскиот амбиент и предвидливоста што секогаш може да влијае и на цените на енергенсите, да создаде тешкотии кај ланците на испораки, но и да влијае на достапноста на одредени материјали. Главните суровини кои се користат во процесот на производство, покажаа нагорен тренд што најмногу е видливо кај какаото“, стои во шестмесечниот извештај на „Витаминка“.