Скапите суровини се тест за отпорноста: како се снаоѓаат „Подравка“ и „Атлантик“?

За двата хрватски гиганти, производители на производи за широка потрошувачка, „Атлантик група“ и „Подравка“, и понатаму макроекономските фактори ќе имаат влијание врз профитабилноста, поточно движењата на пазарните цени на кафето и какаото. Двете компании инвестираа во плати за вработените со цел да ја намалат флуктуацијата на кадар, свесно жртвувајќи дел од својата профитабилност за да го одржат континуитетот во работењето. Сепак, притисокот од платите е „поблаг“ фактор за намалување на профитабилноста — фокусот е насочен кон влезните суровини.

 

Кога зборуваме за работењето, „Подравка“ оваа година доби уште еден столб на работење – агро-сегментот преземен од „Фортенова“. „Атлантик“ исто така беше активен на ова поле, но не во доволна мера за приходите од продажба да бидат водени од компанијата која ја презеде. Ефектите од преземањето на компанијата „Осем“ ќе се видливи дури во втората половина од годината.

„Атлантик група“ во првиот квартал оствари пораст на приходите од продажба од 9,8 отсто на годишно ниво, па се очекува трендот да продолжи и во вториот квартал. Се очекува сите деловни области да бележат годишен раст, со најголеми надежи во сегментот „кафе“, бидејќи кафето во првиот квартал учествуваше со речиси четвртина од вкупните приходи, што е значителен чекор напред во однос на првиот квартал од минатата година, кога тој удел беше една петина. Секако, треба да се земе предвид и аквизицијата што компанијата ја реализираше во Србија.

Меѓутоа, токму ова деловно подрачје трпи најголем притисок врз профитабилноста поради високите цени на суровото кафе, и се очекува дел од цените да бидат префрлени на потрошувачите. Се очекува сличен удел на кафето и во вториот квартал. Двоцифрените ЕБИТДА маржи останаа во минатото – од минатата година започна нивното намалување. Тоа е поврзано со новите набавки на суровини, пред сè какао и кафе, бидејќи „Атлантик“ ги исцрпи старите резерви и почна да набавува нови по повисоки цени. Со оглед на моменталната ситуација со набавките и високите влезни трошоци, ЕБИТДА маржата од 8,8 отсто во првиот квартал се очекува да се намали и да се приближи кон средна едноцифрена стапка.

„Атлантик“ продолжува со централизирање на производството и пакувањето на кафе во Србија, како и со вложувања во сегментот „слатко и солено“, што дополнително ќе ги оптовари инвестициските парични текови, бидејќи оперативниот паричен тек во првиот квартал беше негативен за 10 милиони евра. Доколку „Атлантик“ не ги подобрил приливите од оперативни активности, постои можност инвестициите да се одложат за втората половина од годината. Сепак, ова сценарио изгледа малку веројатно, па повеќе се очекува дека најавата за емисија на обврзница од 80 милиони евра ќе овозможи реализација на сите планирани инвестиции без значително зголемување на задолженоста.

„Подравка“ силно влезе во 2025 година, со бизнис-приходи зголемени за речиси 22 отсто во однос на првите три месеци од 2024 година. Ефектот од новиот агро – сегмент ќе биде присутен цела година во финансиските извештаи на компанијата, така што не се очекува голема промена во кварталната динамика. Агро-сегментот го амортизираше негативниот ефект од повисоките набавни цени на суровините и придонесе ЕБИТДА да порасне за 59 милиони евра, односно 156 отсто повеќе во однос на првиот квартал лани, иако ЕБИТДА маржата падна за 1,8 процентни поени. Сегментот „прехрана“ и понатаму е доминантен со над 60 отсто од вкупните приходи, што значи дека има големо влијание врз профитабилноста на групацијата преку цените на суровините.

За двете компании, клучно прашање за профитабилноста е временскиот момент на набавка и во која мера се подготвени да ги пренесат повисоките трошоци на потрошувачите. Бруто маржата на „Подравка“ е пониска во првите три месеци од 2025 година во однос на истиот период лани за околу 4,5 процентни поени, па се очекува и во остатокот од годината дел од влезните трошоци да бидат апсорбирани од страна на компанијата, со свесно жртвување на дел од профитабилноста. Ова може делумно да се оправда со тоа што се очекува посилен придонес од агро-сегментот.

И „Подравка“ и „Атлантик“ бележат благ пад на цената на акциите од почетокот на годината – 2,3 и 7,3 отсто, соодветно – што е во согласност со нивната пазарна зависност од суровините и менаџирањето со набавките. За набавка на кафе, моментално може да се смета дека е поволен период, бидејќи цената е пониска отколку во првите месеци од годината (јануари-април), најмногу поради зголемен увоз од САД, каде што пржилниците се снабдуваат пред воведување на нови царини (најавени за почетокот на август). Кај какаото, ниските цени останаа во 2023 година – од почетокот на 2025 цените се многу нестабилни, но во моментов цената е за 27,1 отсто пониска во однос на почетокот на оваа година.

Во моментов нема коментари за веста. Биди прв да коментира...

Остави коментар