„Нестле“ и „Унилевер“ најавуваат нови поскапувања

„Унилевер“ (Unilever Plc) и „Нестле“ (Nestlé SA) во првиот квартал објавија подобри продажби од очекуваното, откако ги зголемија цените за да ги компензираат растечките трошоци за суровини.

Двете компании, кои изгубија удел на пазарот поради инфлацијата за време на пандемијата, рекоа дека потрошувачите ќе треба да  преземат дел од товарот бидејќи глобалната трговска војна и растечките цени на суровините повторно ги зголемуваат нивните трошоци.

„Се обидуваме колку што можеме да балансираме за да ги покриеме трошоците, имајќи притоа предвид како ќе реагираат потрошувачите во конкурентна средина“, изјави генералниот директор на „Нестле“, Лоран Фреше, на телефонски повик со новинари. „Точно е дека расположението кај потрошувачите е опаднато, и тоа не само во САД туку насекаде“.

„Нестле“ и нејзините конкуренти се погодени од растечките трошоци за кафе, какао и други суровини во текот на изминатата година, што ги принуди да ги зголемат цените или да се соочат со намалување на маржите. На некои пазари зголемувањето на цените е двоцифрено. Префрлањето на повисоките трошоци врз потрошувачите може да ги натера да преминат кон поевтини производи од помалку познати брендови – како што се случи кога цените пораснаа премногу по пандемијата.

Директорот на „Нестле“, Лоран Фреше. Фото: Блумберг

 

Заканите од нови царини од страна на претседателот Доналд Трамп дополнително ја намалуваат побарувачката и ги зголемуваат стравувањата од забавување на глобалната економија.

Големите прехранбени компании сега мора да бидат претпазливи во пристапот, бидејќи за време на пандемијата ја ослабнаа својата позиција на пазарот со преголемо зголемување на цените, поради што потрошувачите почнаа да се прашуваат дали брендовите навистина нудат вредност за вложените пари, вели аналитичарот Роберт Москов од „ТД Коувен“ (TD Cowen).

Двете компании велат дека се селективни во тоа каде ги зголемуваат цените, а „Нестле“ – чиј раст на продажбата во 2024 година падна на најниско ниво невидено со децении – сугерира дека двоцифрените зголемувања на цените за кафето и чоколадото, како „неспресо“ (Nespresso) и „киткет“ (KitKat), на некои пазари предизвикале само „ограничено незадоволство кај купувачите“.

Повеќето ценовни преговори на развиените пазари обично се одвиваат на почетокот на годината, што значи дека компанијата во голема мера веќе го поминала тој бран на поскапувања, рече директорот на компанијата, Фреше.

Иако отсуството на „нови негативни фактори“ носи олеснување за „Нестле“, извештајот „не дава одговори на прашањата за долгорочната стратегија“ во врска со понудата на производи или за формата на закрепнување на обемот на продажба, напиша аналитичарот Седрик Беснар од „Ситигруп“ (Citigroup).

Болка на пазарите во развој

За „Унилевер“, пак, зголемувањето на цените и растот на обемот на продажба беа подобро балансирани во развиените пазари, како Северна Америка, каде што обемот скокна за 4 отсто. Сепак, одделот на компанијата за пазари во развој – кои сочинуваат речиси 60 проценти од приходите и за кои компанијата долго време ја истакнуваше перспективата за раст – беше со послаби резултати, со најголем дел од растот на продажбата постигнат преку зголемување на цените.

Латинска Америка беше особено погодена, со оглед на тоа што високите каматни стапки ја намалија потрошувачката и доведоа до намалување на резервите кај трговците на мало. Растот на обемот стана негативен во Мексико и Аргентина, изјави извршниот директор на „Унилевер“, Фернандо Фернандез, кој беше назначен на функцијата во март, по смената на Хајн Шумахер.

Продажбата на „Унилевер“ исто така падна двоцифрено во Кина и остана слаба во Индонезија, каде што компанијата е погодена од локалната конкуренција и бојкотите на западни производи.

„Свесни сме за постојаниот притисок врз потрошувачите“, рече Фернандез, додавајќи дека постојат и други механизми што компанијата може да ги искористи, како на пример намалување на големината на пакувањата. „Зголемувањето на цените е секогаш последна опција за да ги заштитиме нашите маржи“. Сепак, тој рече дека имало инфлација на суровините во текот на годината, особено кај производите за лична нега и сладолед.

Двете компании ја потврдија својата прогноза за подобрување на растот на продажбата, при што „Унилевер“ предвидува мало подобрување на својата оперативна маржа, во споредба со 18,4 отсто остварени во 2024 година.

Акциите на „Нестле“ и на „Унилевер“ паднаа во раното тргување на берзите, но подоцна го ублажија минусот.

„Најважниот заклучок од резултатите на двете компании е дека цените повторно растат“, рече Крис Бекет, шеф на истражувачкиот тим во „Квилтер Шевио“ (Quilter Cheviot), иако минатата година „сета дискусија беше за падот на инфлацијата и за подобар баланс меѓу обемот и цената“.

„Потрошувачите низ целиот свет, разбирливо, се несигурни“, додаде тој.

Во моментов нема коментари за веста. Биди прв да коментира...

Остави коментар