Израел и Хамас се очекува да започнат преговори со посредници денеска, со цел да се стави крај на двегодишниот конфликт кој ја опустоши Газа и го дестабилизира Блискиот Исток, откако претседателот на САД, Доналд Трамп, ја поздрави понудата на милитантната група за ослободување на сите заложници.
Добро утро, ова се останатите пет вести што се важни за почеток на денот.
Цената на какаото паѓа, но поевтино чоколадо ќе чекаме за Велигден
Откако постигна историски врв од над 12.000 долари за тон во 2024 година, годинава цената на какаото падна на пoд 7.000 долари за тон, што го направи една од берзанските суровини со најлоши перформанси во 2025 година.
Фјучерсите на какао паднаа на 10-месечен минимум на Њујоршката берза, откако почетокот на жетвата во Брегот на Слоновата Коска, најголемиот светски производител, навестува дека понудата на краток рок ќе се зголеми.
Солени цени на кафето во Македонија, какви се трендовите во светот?
Просечната цена на килограм пржено кафе во зрно во Македонија пораснала од 662 денари во јануари на 841 денар во август годинава, покажуваат податоците на Државниот завод за статистика. Станува збор за драстично зголемување од почетокот на годинава иако во август има благо намалување на цената во однос на јули (за пет денари по килограм).
Со оглед на тоа што Македонија е стопроцетно зависна од увоз на кафе, анализиравме какви се трендовите на цените на светските берзи и какви се прогнозите за идниот период.
Преглед на берзите: Кога рекордот станува секојдневен израз
Минатата недела берзите повторно ја покажаа својата сила. Септември, кој историски се смета за еден од најлошите месеци за берзанските индекси, овојпат заврши во зелено. Во САД, инвеститорите реагираа на затворањето на владата со рамнодушност и не ги вознемири фактот дека податоците за вработеноста нема да бидат објавени навреме.
Индексот S&P 500, по растот од 3,5 отсто во септември, доби уште еден процент. Американските акции во петокот достигнаа рекордни вредности, поттикнати од нов бран големи зделки во областа на вештачката интелигенција.
Нов историски рекорд: Биткоинот надмина 125.000 долари
Биткоинoт постави нов рекорд бидејќи пошироката финансиска еуфорија поврзана со затворањето на американската влада ја поттикна најголемата криптовалута во светот.
Токенот достигна до 125.689 долари во неделата во Азија, надминувајќи го претходниот рекорд поставен на 14 август, поддржан од растот на американските акции и обновените инвестиции во фондови поврзани со биткоин. Инвеститорите шпекулираат дека затворањето, кое започна во средата, ќе ги насочи вложувањата кон „безбедни засолништа“ — тренд кој пазарните учесници го нарекуваат „трговија со девалвација“.
ОПЕК+ договори благо зголемување на производството на нафта во ноември
Организацијата на земјите извознички на нафта (OПEK+) договори благо зголемување на производството за ноември, откако водечките членки Саудиска Арабија и Русија успеаја да ги надминат разликите во ставовите.
ОПЕК+ ќе го зголеми производството следниот месец за 137 илјади барели дневно, потврдува соопштението на веб-страницата на организацијата. Следниот состанок на членките е најавен за 2 ноември.
.webp){kind=icon}
