Најголемото тестирање досега на четиридневната работна недела покажа дека повеќето компании во Обединетото Кралство што учествувале не се враќаат на петдневниот стандард, а третина се подготвени да ја направат таа промена трајна.
Студијата опфати 61 организација и околу 2.900 работници што доброволно прифатија скратени работни недели од јуни до декември 2022 година. Само три организации одлучиле да го паузираат експериментот, од кои две сè уште размислуваат за пократки часови, покажаа податоците објавени во вторникот. Преостанатите се убедени во добивката на приходите и пониските нивоа на исцрпеност на работниците, односно дека четири се новите пет кога станува збор за работните денови.
За истакнување е тоа што илјадници вработени се приспособија на пократки распореди, со оглед на тоа што истражувањето се случи за време на тешки економски околности што притискаат многу британски компании, вклучувајќи ги и брзата инфлација, политичката нестабилност и последиците од брегзит. На моменти започнувањето програма за намалување на работните часови среде економски пад изгледало дискутабилно.
„Се прашував дали можеби е многу потешко за компаниите да работат во четиридневни недели, а одговорот се чини дека е не“, вели водечката истражувачка Џулиет Шор, економистка и социолог на Бостонскиот колеџ. Нејзиното истражување открива дека петдневните работни недели повеќе не одговараат на начинот на живот и обврските на современите вработени, особено на оние со деца. „Организациите завршија одлична работа и тие се навистина задоволни со тоа“.
Ефектот на четиридневната недела
Истражувачите ги анкетирале работниците пред и по испитувањето
Bloomberg
Податоците од Британија силно ги потврдуваат наодите од помалите испитувања чии резултати беа објавени во декември, на компании со седиште во САД, Ирска и Австралија. Тоа истражување покажа еквивалентни добивки во приходите и продуктивноста на вработените, како и пад на отсуствата. Тие пилот-програми беа помали, покривајќи приближно половина од бројот на компании од тестот спроведен во Обединетото Кралство и третина од вработените.
„Во основа добивме многу слични резултати“, вели Шор. „Разликите беа маргинални - навистина ништо за што вреди да се зборува“.
Резултатите од ОК се второто големо објавување податоци во тековната серија четиридневни тестови координирани од „Фор деј вик глобал“ (4-Day Week Global), непрофитна група со седиште во Нов Зеланд. Со секое повторување, истражувачите ја приспособуваат својата база на податоци и ги следат долгорочните ефекти од пократките распореди.
Иако студиите се добро дизајнирани и вклучуваат организации низ цела низа индустрии, меѓу слабите точки може да се вброи тоа што организациите учеснички се помали и дека испитувањата не се оптимизирани: сите организации учеснички се одлучни да вложат значителни напори во обуки и планирање - што значи дека лидерите се пристрасни кон залагање за пократки работни распореди.
Пократка работа во време на криза со трошоците за живот
Она што го добиваат им се допаѓа на вработените што ја „вкусиле“ пократката работна недела. Со новиот распоред, работниците бележат подобрувања во сè, од стрес, замор и здравје до нивниот личен живот. Времето што мажите го минуваат во грижа за децата се зголемило за повеќе од двојно од времето на жените за време на испитувањето. Ниту еден од 2.900 учесници не рекол дека сака да се откаже од четиридневниот аранжман, а 15 отсто дури посочиле дека ниту една сума дополнителни пари не може да ги натера да се вратат на пет дена. Повеќето компании усвоиле четиридневни распореди, иако мал процент се одлучил и за пократки петдневни аранжмани или, во случај на сезонски бизниси како ресторани, годишен модел од четири дена во неделата со подолго работно време налето, кое би се компензирало за пократок ангажман во зима.
Сепак, неодамнешните докази покажаа дека многу субјекти во Британија всушност сакаат да работат подолго. Многумина го гледаат тоа како спас и зголемување на нивната заработувачка во услови на криза со трошоците за живот, според Институтот за персонал и развој.
„Поентата на студијата е да се соберат докази од широк спектар на компании за да се оспори ставот дека тоа не може да се направи“, вели Џон Бојс, висок економист за пазарот на трудот во CIPD. „Голем ризик е што намалувањето на часовите за 20 отсто бара зголемување на продуктивноста за 25 отсто за да се одржи стабилно производство“.
Свежите резултати од Британија помагаат да се ажурираат податоците во прилог на четиридневната недела. Приходите на организациите се зголемија за 35 отсто во однос на претходната година и за 1,4 отсто за време на програмата. Иако компаниските мерки за ценење на продуктивноста се тешки, организациите го оценуваат влијанието на четиридневните распореди како позитивно, во просек 7,5 на скала од 10 точки. Отсуството на вработените се намалило од два дена месечно на 0,7. Компаниите го оцениле целокупното искуство со 8,3 од 10.
Консултантската компанија за животна средина „Тајлер Гранџ“ (Tyler Grange), која трајно усвои четиридневен распоред за своите околу 100 вработени по испитувањето, посочува дека пократкиот распоред ја зголемил продуктивноста за повеќе од една петтина и довел до околу 18 помалку изгубени денови месечно поради болест. Вработените исто така нагласиле дека минувањето дополнителен ден дома им помогнало да ги намалат трошоците за грижа за децата и патување.
Добивки и загуби во флексибилноста
По пандемијата, флексибилноста околу балансот помеѓу работата и животот стана суштинска за повеќето компании да ги задржат работниците на тесниот пазар на трудот. Сега некои ја гледаат четиридневната работна недела како ново оружје во битката за таленти.
Бројот на луѓе што ги испраќаа своите биографии во „Тајлер Гранџ“ речиси се удвоил по почетокот на студијата, и покрај релативно малкуте слободни работни места.
„Четиридневната недела е клучна стратегија за привлекување и задржување на вработените“, се вели во соопштението на организацијата.
Вработените во непрофитните организации и сферата на професионални услуги бележат поголеми придобивки во времето поминато во вежбање, додека градежните работници бележат најголеми придобивки околу проблемите со спиењето и исцрпеноста, покажуваат резултатите од испитувањата во Британија.
Жените особено имаат корист од дополнителниот слободен ден. Иако двата пола пријавиле подобри резултати, жените доживеале поголем напредок во животот и задоволство од работата. Тоа исто така ја менува динамиката на домаќинството, бидејќи мажите посочиле дека повеќе се грижат за децата и домашните работи - сè уште не носат удел од 50 отсто.
Сепак, кога станува збор за врската помеѓу работните денови и флексибилноста, некои се скептични дека помалку е повеќе.
„Ја губите флексибилноста со четири дена“, вели Метју Крамак, главен извршен директор во „Доместик енд џенерал“ (Domestic & General), која обезбедува услуги за осигурување и поправка на апарати. „Нашиот став е дека неизбежно на петтиот ден нешто ќе се појави и ќе мора да работите“.
Наместо тоа, компанијата на Крамак усвоила целосно флексибилен работен модел по пандемијата, што во суштина одлуката за враќање во канцеларија им ја препушта целосно на вработените.
Компаниите што сакаат да се префрлат на четиридневни недели исто така ќе наидат на други практични прашања, како што е дали да им се зголеми платата на 25 отсто од работната сила во ОК што веќе работи четири дена неделно или помалку, посочуваат од CIPD.
„Експериментот веројатно ќе се смета за успешен ако цврстите метрики, како што се продуктивноста и приходите, се задржат, како и другите метрики, како благосостојбата. На крајот од краиштата, бизнисите имаат малку да изгубат со проба и експериментирање“, вели Бојс од CIPD. „За повеќето бизниси одговорот го кажуваат парите“.
.webp){kind=icon}
Во моментов нема коментари за веста. Биди прв да коментира...