ЧетГПТ ќе овозможи четиридневна работна недела, вели нобеловец

Еволуцијата на ЧетГПТ (ChatGPT) ја отвора вратата за четиридневна работна недела бидејќи ја зголемува продуктивноста на многу работни места, тврди економист што е добитник на Нобелова награда.

Кристофер Писаридес, професор на Лондонската школа за економија, кој е специјализиран за влијанието на автоматизацијата врз работата, вели дека пазарот на трудот може доволно брзо да се приспособи на четботовите со вештачка интелигенција (ВИ). Неговите забелешки донекаде ја намалуваат загриженоста дека брзиот напредок во технологијата може да доведе до огромни загуби на работни места.

„Јас сум голем оптимист дека би можеле да ја зголемиме продуктивноста“, рече тој во интервју на конференција во Глазгов. „Можеме да го подобриме целокупното задоволство од работата и да имаме повеќе слободно време“.

Четботовите како што се ЧетГПТ на „Опен еј-ај“ (OpenAI) и Бард (Bard) на „Гугл“ (Google) се наметнуваат како потенцијално трансформативна технологија што може да предизвика бум во продуктивноста, но постојат и стравувања дека поради неа под закана може да се најдат стотици милиони канцелариски работни места.

Писаридес го истражувал влијанието на автоматизацијата на работните места во своето дело „Преглед на Писаридес во иднината на работата и благосостојбата“ (анг. Pissarides Review into the Future of Work and Wellbeing). Тој ја доби Нобеловата награда за економија за неговата работа во однос на предизвиците на пазарот на трудот.

Писаридес смета дека технологијата може да се злоупотреби и за надзор или нарушување на приватноста. Но тој нагласи дека ако се користи добро, може да направи „огромна разлика“ во продуктивноста.

Здодевни работни места

„Ова би можело да нè ослободи од многу здодевни работни позиции (...) и да им ги остави на луѓето само со интересните“, рече тој. Транзицијата ќе биде помалку болна за вработените бидејќи компаниите бавно ја прифаќаат технологијата и покрај тоа што таа самата по себе „се движи брзо“.

Некои се загрижени за влијанието на технологијата врз општеството. Технолошки лидери, вклучувајќи го и Илон Маск, потпишаа отворено писмо минатиот месец во кое повикуваат на пауза во обуката на моќните системи за вештачка интелигенција.

Прочитајте повеќе: Маск и други технолошки лидери: Ситуацијата со ВИ е надвор од контрола

Нема ограничувања

„Едноставно нема ограничување колку може да работи човештвото доколку навистина сака да работи“, вели Писаридес. „Ќе биде потребно долго време за да има вистинско влијание и за тоа време луѓето ќе се приспособат. Она што е потребно во таквата адаптација е префинетост“.

Depositphotos

Неговите забелешки следуваат по извештајот на „Голдман Сакс“ (Goldman Sachs), во кој се проценува дека 300 милиони работни места на глобално ниво се изложени на генеративната вештачка интелигенција, како што е ЧетГПТ. Економистите на банката се согласуваат дека ова може да биде трансформативно за продуктивноста и економскиот раст.

Прочитајте повеќе: „Голдман Сакс“: Вештачката интелигенција ќе донесе неверојатен глобален раст

Во развиените економии продуктивноста опаѓа по финансиската криза, што значително го забави растот на бруто-домашниот производ (БДП).

„Комбинацијата од заштеди на трошоците за работна сила, отворање работни места и поголема продуктивност на работниците ја зголемува можноста за поголема продуктивност, што значително го покачува економскиот раст“, ​​велат економистите на „Голдман“ во извештајот од минатиот месец. „Проценуваме дека вештачката интелигенција на крајот би можела да го зголеми годишниот глобален БДП за седум отсто“.