ВИ е бран голем колку и појавата на интернетот, вели шефот на „Мајкрософт“

Во 1995 година, коосновачот на „Мајкрософт“, Бил Гејтс, испрати меморандум во кој го нарече интернетот „плимин бран“ што ќе биде клучен за секој дел од бизнисот на компанијата. Речиси две децении подоцна, сегашниот лидер на оваа технолошка компанија Сатја Надела рече дека верува оти влијанието на вештачката интелигенција (ВИ) ќе биде исто толку значајно.

„Дописот на Бил од 1995 година ме потсетува на ова“, рече Надела во овонеделната епизода на „Колото со Емили Чанг“ (The Circuit With Emily Chang). „Мислам дека (вештачката интелигенција) е исто толку голема работа“.

Централно место во најновите напори за трансформација на „Мајкрософт“ има „Опен еј-ај“ (OpenAI), стартап чија технологија за генеративна вештачка интелигенција предизвика толку многу внимание, па од софтверскиот гигант доби 13 милијарди долари во инвестиции.

„Имаме одличен однос“, изјави извршниот директор на „Опен еј-ај“, Сем Алтман, за „Колото“ (The Circuit). „Големите партнерства меѓу технолошките компании обично не функционираат. Ова е пример дека тоа е сè уште можно. Ние сме многу благодарни за тоа.“

Партнерството наиде на многу критики. Најгласен е Илон Маск, кој го основа „Опен еј-ај“ заедно со Алтман, а потоа се раздели од компанијата, како причина наведувајќи ги несогласувањата околу насоките за развој. Тој рече дека „Опен еј-ај“ сега е „де факто контролиран од Мајкрософт“.

Запрашан за критиките на Маск и изгледите „Мајкрософт“ да го купи „Опен еј-ај“, Алтман нагласи дека компанијата не е на продажба.

Исто како што „Нетскејп“ (Netscape) го инспирираше дописот на Гејтс во однос на интернетот, создавањето на „Опен еј-ај“ и поддршката од „Мајкрософт“ беа делумно поттикнати од заканата дека „Гугл“ ќе доминира во вештачката интелигенција. Архитектурата за ЧетГПТ (ChatGPT) на „Опен еј-ај“ и четботот на Бинг на „Мајкрософт“ ја измисли „Гугл“. Иако оваа компанија е сè уште конкурентна на полето на вештачката интелигенција, „Мајкрософт“ и „Опен еј-ај“ се сметаат за рани лидери.

Сепак, Алтман вели дека позицијата на „Опен еј-ај“ во областа на вештачката интелигенција е далеку од безбедна. „Ова не е само конкурентна средина, туку мислам дека ова е најконкурентната средина во технологијата во моментов“, рече тој.

Портпаролот на „Мајкрософт“ истакна дека компанијата ги поздравува дискусиите со владите за пазарна трка и конкурентност во полето на вештачката интелигенција. Во интервјуто за „Колото“, Надела предупреди дека вистинското влијание на вештачката интелигенција допрва треба да се види.

„Во технолошката индустрија сме експерти за претерување“, рече извршниот директор на „Мајкрософт“. „Она што ме мотивира е тоа што сакам да ја користам оваа технологија за она за што сметам дека ваквата технологија треба да служи, а тоа е демократизација на нејзината достапност“.