Дали на вештачката интелигенција местото ѝ е во канцеларија?

Сè повеќе компании ја интегрираат вештачката интелигенција во нивните платформи и работни места, но загриженоста останува.

Компаниите продолжуваат да дебатираат за придобивките од вештачката интелигенција на работното место. Некои ги забранија алатките како ЧетГПТ повикувајќи се на загриженост за безбедноста на информациите, додека други се вклучија во генеративната вештачка интелигенција.

Хеџ фондовите и другите финансиски менаџери сè повеќе го користат ЧетГПТ на „Опен АИ“ (OpenAI Inc) за маркетинг и сумирање на документи. Но, претседателот на американската Комисијата за хартии од вредност, Гери Генслер, е фокусиран на ризикот за пазарите и инвеститорите кога вештачката интелигенција врши тргување и дава препораки.

Гери Генслер, претседател на Комисијата за хартии од вредност на САД Bloomberg

Доаѓаат повеќе чет-ботови. „Убер технолоџис“ (Uber Technologies Inc.) развива сопствен бот. И како што се приближува сезоната на враќање во училиште, платформите за онлајн образование „Пирсон“ (Pearson Plc) и „Курсера“ ( Coursera Inc.)  воведуваат свои алатки за вештачка интелигенција.

ЕУ го предводи патот во регулирањето на вештачката интелигенција, станувајќи една од првите во светот што презеде сеопфатна акција. Во исто време, европските бизниси не сакаат да бидат изоставени од бумот на вештачката интелигенција како што тоа го правеа кога интернетот почна да се развива.

Во вестите за заработка, компаниите за интернет услуги покажуваат рани знаци на враќање, но генеративната вештачка интелигенција сè уште не направила многу за да ја зголеми продажбата на овие услуги.

„Адвенсд микро дивајсес“ (Advanced Micro Devices Inc.)  ја зголеми вредноста откако производителот на чипови ги надмина проценките во вториот квартал, ставајќи го во потесна конкуренција со „Енвидија“ (Nvidia Corp.).

Во меѓувреме, „Тајван Семикондактор“ (Taiwan Semiconductor Manufacturing Co.), најголемиот светски производител на чипови и клучен снабдувач на „Енвидија“, падна за повеќе од шест отсто од својот врв во јуни.

Во Јужна Кореја, малку познатиот производител на плочи за печатени кола - кој ги брои „Алфабет“, „Енвидија“ и „Мајкрософт“ како клиенти - забележа пораст на цената на акциите за 487 отсто оваа година.

Вештачката интелигенција, исто така, може да поттикне континуиран раст на акциите на „Адоб“ (Adobe Inc). Аналитичар во „Морган Стенли“ (Morgan Stanley) прогнозира дека акциите на производителот на креативен софтвер ќе се зголемат за дополнителни 25 отсто во текот на следната година.