Маск го претстави својот адут во сферата на вештачката интелигенција

Илон Маск, кој со месеци навестуваше дека сака да создаде алтернатива на популарниот четбот за вештачка интелигенција ЧетГПТ (ChatGPT), го најави формирањето на, како што тој ја нарекува „Екс еј-ај“ (xAI), компанија со мисија да ја „разбере вистинската природа на универзумот“.

На веб-страницата претставена во средата, „Екс еј-ај“ посочува дека нејзиниот тим ќе биде предводен од Маск и со персонал од директори кои работеле во широк спектар на компании, во првите редови за развој на вештачка интелигенција, вклучувајќи ги „Гугл Дипмајнд“ (Google DeepMind), „Мајкрософт“ (Microsoft Corp.) и „Тесла“ (Tesla Inc.), како и академски институции како што е Универзитетот во Торонто.

Маск беше вклучен во создавањето на „Опен еј-ај“ (OpenAI), најпознатиот стартап за вештачка интелигенција и развивач на ЧетГПТ. Но, тој често и јавно го критикуваше„Опен еј-ај“ откако го напушти одборот во 2018 година, а особено откако создаде профитна група следната година. Тој рече дека верува оти фирмата е „ефективно контролирана од Мајкрософт“. „Мајкрософт“ инвестираше околу 13 милијарди долари во „Опен еј-ај“.

И покрај неговата работа во сферата на вештачката интелигенција, Маск изрази длабока резервираност за технологијата. Милијардерот беше меѓу групата истражувачи и лидери од технолошката индустрија кои во март ги повикаа програмерите да ја прекинат обуката на моќните модели за вештачка интелигенција.

Од 12-те луѓе, вклучувајќи го и Маск, наведени на веб-страницата во средата наутро, мнозинството претходно работеле во „Гугл“ (Google) во одредено својство или во единицата за вештачка интелигенција со седиште во Лондон, „Дипмајнд“ (DeepMind). Едниот, Кристијан Сегеди, минал години како истражувачки научник во компанијата. Други поранешни вработени од „Гугл“ се Игор Бабушкин, Зижанг Даи, Тони Ву и Тоби Полен.

Стартапот на Маск додаде и двајца академици од Универзитетот во Торонто, Гуодонг Џанг и Џими Ба, асистент професор кој студирал кај пионерот на вештачката интелигенција, Џефри Хинтон. И Ба и Џанг наведуваат стажирање во „Дипмајнд“ во нивните биографии.

Ба е еден од најпознатите ангажмани објавени од „Екс еј-ај“ во средата. Тој е коавтор, заедно со Дидерик Кингма, на труд од 2014 година за оптимизација на длабокото учење познат како трудот „Адам“. Тоа е најцитираниот труд за вештачка интелигенција, со 95.460 цитати, според научната мрежна страница „Рисрч гејт“ (ResearchGate).

Ба „има уникатен мозок“, вели Девал Пандја, директор за инженерство за вештачка интелигенција во институтот „Вектор“, канадска непрофитна организација посветена на истражување на вештачката интелигенција, каде што Ба исто така работеше како истражувач. „Тој достигна голема оригиналност во методите во споредба со неговите врсници“, рече Пандја.

Ба моментално е на одмор од универзитетот, според раководителот на одделот за компјутерски науки, Ејал де Лара, а исто така е на одмор од „Вектор“, според веб-страницата на институтот.

Иако Маск е чест критичар на Сан Франциско, веб-страницата на „Екс еј-ај“ посочува дека компанијата „активно регрутира искусни инженери и истражувачи“ да работат „во Заливот“. Досега најголемиот дел од развојот на вештачката интелигенција беше концентриран во Силициумската долина.

Маск (52) сега надгледува шест компании: „Тесла“ (Tesla), „Спејс екс“ (SpaceX), „Твитер“ (Twitter), „Неуралинк“ (Neuralink), „Боринг“ (Boring Co.) и сега „Екс еј-ај“. Во регулаторните документи, „Тесла“ посочува дека автомобилскиот гигант „сè повеќе се фокусира на производи и услуги базирани на вештачка интелигенција, роботика и автоматизација“. Веб-страницата на „Тесла“ ги поканува луѓето да помогнат во „изградбата на иднината на вештачката интелигенција“ со различни производи, од „тесла бот“ (Tesla Bot) познат како „оптимус“ (Optimus) до чипови за интерфејс со вештачка интелигенција што ќе го управуваат софтверот за автоматско возење на електричниот производител.

Веб-страницата „Екс еј-ај“ вели дека е „одвоена компанија од 'Екс корп' (X Corp)“, матичната компанија кон која Маск го припои и „Твитер“ (Twitter) претходно оваа година, но дека „ќе соработува тесно“ со X („Твитер“), „Тесла“ и други компании.

Драматичниот влез на Маск во светот на вештачката интелигенција привлече внимание од постоечките компании. „Илон е еден од големите претприемачи на нашето време“, рече Рид Хофман, ко-основач на „Линкдин“ (LinkedIn) и на стартапот „Инфекшн“ (Inflection AI).

Во моментов нема коментари за веста. Биди прв да коментира...

Остави коментар