Илон Маск сака да создаде ривал на феноменот на вештачката интелигенција ЧетГПТ (ChatGPT). Во вчерашното интервју со Такер Карлсон, Маск потврди дека планира да создаде „трета опција“ во трката за вештачка интелигенција меѓу „Опен еј-ај“ (OpenAI), поддржана од „Мајкрософт“ (Microsoft Corp) и „Гугл“ (Google), и „Дип мајнд“ (DeepMind) на „Алфабет“ (Alphabet Inc).
Шефот на „Тесла“ (Tesla Inc) и сопственик на „Твитер“ (Twitter) потврди дека има намера да се вклучи во трката за вештачка интелигенција поттикната од интелигентниот четбот на „Опен еј-ај“. Гледајќи ги „Мајкрософт“ и „Гугл“ како „два гиганта“ што во моментов го предводат пазарот, Маск понуди дека ќе создаде трета опција. Тој не кажа детали за напредниот систем за вештачка интелигенција што ќе се обиде да го создаде.
Во март Маск инкорпорираше нова компанија за вештачка интелигенција, наречена „Екс еј-ај“ (X.AI), во државата Невада. Истиот месец тој потпиша и отворено писмо, заедно со стотици други технолошки личности, барајќи шестмесечна пауза во развојот и обуката на напредни модели со вештачка интелигенција. Маск беше гласен критичар на други компании за вештачка интелигенција, вклучувајќи го и „Опен еј-ај“, во чиешто основање и самиот имаше улога.
Новата компанија за вештачка интелигенција би можела да биде дел од неговите планови да изгради апликација за сè, наречена „Екс“ (X). Маск го спои „Твитер“ во компанија наречена „Екс корп“ (X Corp), а во друго неодамнешно интервју ги повика слушателите да очекуваат повеќе на тој план. Тој исто така го потврди претходниот извештај за намалување на вредноста на „Твитер“ од неговото преземање минатата година.
„Само што ја ревалоризиравме компанијата на помалку од половина од цената на аквизицијата“, му рече тој на Карлсон. Маск го приватизира „Твитер“ со договор вреден 44 милијарди долари, а „Информејшн“ (The Information) неодамна објави дека на вработените во „Твитер“ им понудил нови акции со проценета вредност на компанијата од 20 милијарди долари.
За време на вчерашното интервју, Маск изрази загриженост за контролата и влијанието што „Мајкрософт“ ги има врз „Опен еј-ај“ и транзицијата на стартапот од непрофитна операција. Тој исто така рече дека е загрижен дека четботовите станале премногу политички коректни и дека неговата компанија за вештачка интелигенција ќе се фокусира на вистината и ќе се обиде да ја разбере природата на универзумот.
.webp){kind=icon}