„Епл“ влегува на пазарот на евтини лаптопи

„Епл“ (Apple Inc.) е во подготовки да влезе на пазарот на евтини лаптопи, создавајќи нов модел што ќе биде насочен кон учениците, бизнисите и корисниците што бараат пристапни лаптопи за основни задачи, како пребарување на интернет, работа со документи или лесно уредување мултимедија. Со оваа стратегија, „Епл“ сака да привлече корисници што во моментов се одлучуваат за уреди „хромбук“ (Chromebook) или пристапни модели на лаптопи „виндоус“ (Windows).

Тековниот проект, со кодно име Џ700 (J700), веќе е во активни тестирања во самата компанија и во рана продукција со доставувачи од странство. Првично, „Епл“ планира да го лансира новиот лаптоп во првата половина од следната година, објавија извори блиски до проектот, кои побараа да останат анонимни, бидејќи производот сѐ уште не е официјално најавен.

Новата стратегија на „Епл“ би можела да претставува значаен потег за компанијата, која во изминатите години се фокусираше на премиум уреди со високи профитни маржи. Оваа одлука доаѓа во време кога компанијата се соочува со зголемена конкуренција од страна на моделите „хромбук“ , кои се познати по својата ниска цена, како и од компјутери базирани на „виндоус“, така што „Епл“ има можност да привлече нови корисници. Преминот на „Мајкрософт“ кон виндоус 11, кој остави многу корисници без сигурносни ажурирања, исто така, претставува можност за „Епл“ да ги привлече оние што се разочарани од новата верзија на софтверот.

Поевтин, но моќен

Новиот лаптоп на „Епл“ ќе биде значително поевтин, со цена под 1.000 долари, благодарение на користењето поевтини компоненти. Главната разлика ќе биде во процесорот – наместо вообичаениот процесор „мек“ (Mac), новиот модел ќе користи процесор од „ајфон“ (iPhone), што претставува првпат „Епл“ да користи чип од својот мобилен уред во лаптоп. Внатрешните тестови на „Епл“ покажале дека чиповите на „ајфон“ може да понудат подобри перформанси во споредба со постарите чипови на „мек“, како M1. 

Покрај тоа, новиот лаптоп ќе има помал екран од сите актуелни модели „мек“, со дијагонала нешто помала од 13,6 инчи (слично на „мекбук ер“ / MacBook Air), и поевтин ЛЦД-дисплеј. Се очекува дека батеријата на новиот модел ќе биде поиздржлива и ќе понуди значително подобро искуство за користење во однос на конкурентите на пазарот.

Погодност за во училишта

Понудата на „Епл“ ќе биде насочена и кон учениците и студентите, за кои „ајпад“ (iPad) во комбинација со „меџик киборд фолио“ (Magic Keyboard Folio) е веќе популарен избор, но со новиот лаптоп, корисниците ќе добијат комплетно искуство на лаптоп со инсталиран „мек ОС“ (macOS), интегрирана тастатура и подобра батерија. Овој нов модел ќе има слична цена како и комбинираната цена на „ајпад“ и „меџик киборд“, но ќе понуди поголема флексибилност за работа во училиште, канцеларија или дома.

Во последните години „Епл“ забележа раст во продажбата на уредите „мек“, а овој нов потег би можел да доведе до уште поголема експанзија, особено на американскиот пазар, каде што „ајфон“ веќе има силна присутност.

Конкуренција и идни планови на „Епл“

Со оваа нова стратегија, „Епл“ се впушта во битка за пазарот на евтини лаптопи, на кој доминираат брендови како „Леново“ (Lenovo), „Ејч-пи“ (HP) и „Дел“ (Dell), а исто така и моделите „хромбук“. Но, за разлика од конкурентите, „Епл“ ќе понуди еден од најпознатите и најценети дизајни во индустријата, со високи перформанси и компатибилност со други негови уреди.

За 2026 година „Епл“ веќе подготви нови модели, вклучувајќи M5 чипови за „мекбук ер“ и „мекбук про“, а исто така и нови уреди „мек мини“ и „мек студио“. Покрај тоа, се очекува и ревидиран „мекбук про“ со ОЛЕД-екран и нови дисплеи „мек“, што ќе ја дополнат палетата на уреди.

Со оваа стратегија, „Епл“ изгледа сериозно решен да ја прошири својата присутност на пазарот и да им понуди на корисниците повеќе опции за избор, без да ги загрози своите премиум уреди. Времето ќе покаже дали оваа тактика ќе биде успешна, но едно е сигурно – „Епл“ веќе наметнува темпо на пазарот.