Данска компанија која се занимава со тргување на електрична енергија на дневна основа обработува околу 30 милиони податоци во обид да предвиди како облачното време во Шпанија или зголемувањето на температурите во Германија ќе влијае врз цената на струјата во Франција или на некое друго место во Европа. „МФТ Енерџи“ (MFT Energy) и повеќе од десетина трговци на мало се повеќе користат вештачка интелигенција (ВИ) за да го зголемат профитот. Целиот овој процес влијае на крајната цена што домаќинствата и компаниите ја плаќаат за потрошената електрична енергија.
Речиси половина од тргувањата на „МФТ Енерџи“ (MFT Energy) претходната година биле направени преку алгоритми. На најголемата европска берза за краткорочно тргување во Париз, автоматизираните трансакции лани сочинуваа 60 отсто од вкупните трансакции, што е зголемување од 55 отсто во 2021 година.
„Алгоритамското тргување навистина ќе биде од суштинско значење за да останеме конкурентни“, рече Бред Блеси, главен инвестициски директор во „Траилстоун Груп“(Trailstone Group,) фирма која користи вештачка интелигенција (ВИ) за управување со портфолија со обновливи извори на енергија, прогноза на времето и предвидување на движењата на цените.
Овој начин на тргување е сè поважен бидејќи Европа цели кон обновливите извори на енергија. Производството може многу да варира, во зависност од тоа дали облаците се над соларните централи или силните ветрови доаѓаат од Атлантикот.
Огромното количество податоци потребни за следење на производството и потрошувачката отвораат можности за трговците кои сакаат да користат сателитски снимки, дури и објави на социјалните мрежи за да дознаат за очекуваните промени на цените. Трговците со електрична енергија се дел од сложениот синџир што овозможува функционирање на европскиот електроенергетски систем. Тие помагаат да се балансира системот со испраќање енергија таму каде што е најпотребна и генерираат профит со тоа што се пред пазарот. Во 2022 година „МФТ Енерџи“ (MFT Energy) оствари осум пати поголема добивка на годишно ниво, која достигна 576 милиони евра или 4,4 милиони евра по вработен.
Цената на електричната енергија во Германија овој месец имаше рекорден негативен пад, кога силниот раст на производството од соларни панели ја надмина побарувачката за енергија во текот на викендот.
Но, автоматските системи не се совршени. За време на растот на производството во Германија од соларни извори, луѓето мораа да преземат поголема улога за да ја контролираат состојбата која беше премногу сложена за да се остави само на компјутерските програми.
„Можеме да кажеме дека алгоритмите ќе се користат малку помалку во тие многу екстремни и исклучителни денови. Но, дури и тогаш, алгоритмите ќе придонесат за овозможување ликвидност и ублажување на нестабилноста“, смета шефот на интрадневното тргување во „Данске Комодитес“(Danske Commodities) Тим Кумерфелд, компанија која во 2022 година оставри профит од 2,25 милијарда евра во споредба со 265 милиони евра во претходната година.
Иако автоматизираното тргување се случува на секој можен пазар, од акции до обврзници до нафта и метали, обемот на податоци за понудата, побарувачката и инфраструктурата е она што го издвојува пазарот на електрична енергија. Ова е особено важно за Европа, каде што поврзувањето помеѓу националните електроенергетски системи може да создаде тесни грла во понудата и е многу веројатно дека компјутерите ќе играат сè поважна улога дури и во итни ситуации.Германија има намера да го зголеми капацитетот на соларните централи од 68 на 200 гигавати до крајот на оваа деценија, така што набљудувањето на таквите брзи промени ќе биде сè поклучно.Сепак, човечкото знаење и искуство е тешко да се заменат, така што трговците сепак ќе треба навремено да ги надградуваат моделите на компјутерите.
Bloomberg Mercury
Bloomberg Mercury
.webp){kind=icon}
