Македонските телеком-компании се меѓу оние со најбрз мобилен интернет во Европа

Двете најголеми телекомуникациски компании во Македонија се меѓу оние што нудат најбрз интернет во Европа. Според рангирањето за наградата за брзина на интернет на „Окла“ (Ookla® Speedtest Award™) за првата половина од годинава, „Македонски телеком“ нуди најбрз интернет во земјава и е на високото шесто место во Европа.

Најбрз мобилен интернет во светот нуди „И-енд“ (e&), телекомуникациска компанија од Обединетите Арапски Емирати, чија оценка на просечната брзина е 88,05.

Приватна архива

 

Најдобра компанија во овој поглед односно телеком што нуди најбрз интернет на Стариот Континент е бугарски А1. Оценката за брзината на интернетот на оваа компанија е 81,03, додека оценката на „Македонски телеком“ е 76,8, а на македонската компанија „А1 Македонија“ е 75,58.

„По спроведувањето длабинска анализа на тестовите иницирани од корисниците направени со тестот за брзина (Speedtest), A1 од Бугарија е прогласена за најбрза мобилна мрежа во Европа од страна на ‘Окла’“, пишува во извештајот за првата половина од 2025 година. Наградите „Спидтест“ (Speedtest) ги претставуваат перформансите на мрежата во реалниот свет и брзината на интернет што операторите им ја обезбедуваат на своите корисници.

Покрај бугарската А1, меѓу најдобрите пет телекомуникациски компании во Европа се рангирани и данската „Телија“ (Telia), исландската „Нова“ (Nova), холандската „Одидо“ (Odido), како и норвешката „Теленор“ (Telenor). Веднаш по нив е и „Македонски телеком“.

„‘Македонски телеком’ е најбрзата мобилна мрежа во Северна Македонија во првиот квартал од 2025 година. Наградата ‘Окла спидтест аворд’ (Ookla® Speedtest Award™) за најбрза мобилна мрежа се базира на средната оценка за брзината преку комбинација на брзините на преземање и прикачување заради целосен преглед на перформансите на брзината“, пишува во забелешката на „Окла“ за „Македонски телеком“.

Приватна архива

 

Средната брзина за спуштање податоци преку интернет на „Македонски телеком“ е 184,25 Mbps, а на А1 158,92 Mbps. Просечната брзина, пак, за прикачување податоци на „Македонски телеком“ е 29,56 Mbps, додека на А1 е нешто подобра – 30,64 Mbps.

„Окла“ е глобален лидер во интелигенцијата за поврзаност, кој ја обединува доверливата експертиза на „Спидтест“ (Speedtest), „Дандетектор“ (Downdetector), „Икау“ (Ekahau) и „Рут метрикс“ (RootMetrics) за да испорача длабински увид во тешко споредбени сегменти од мрежата и поврзаноста. Со комбинирање податоци од повеќе извори со водечка експертиза во индустријата, „Окла“ ги трансформира метриките за перформансите на мрежата во стратешки практични увиди.

„Нашите решенија им овозможуваат на давателите на услуги, претпријатијата и владите критични податоци и увиди потребни за оптимизирање на мрежите, подобрување на дигиталните искуства и помош при затворање на дигиталниот јаз. Истовремено, ги засилуваме искуствата во реалниот свет на поединците и бизнисите што се потпираат на поврзаноста за работа, учење и комуникација“, посочуваат од „Окла“, чие рангирање се базира на комбинација на брзините за преземање и прикачување со метрики за латенција (времето што е потребно за трансфер на податоците низ мрежата) за да даде целосен преглед на перформансите на брзината.