ГПТ-4 може да ја претвори работата во хиперактивен пекол

„Опен еј-ај“ (OpenAI) најави голема надградба на технологијата што го поддржува ЧетГПТ (ChatGPT), навидум магичната онлајн алатка која професионалците ја користат за куп работи: е-пошта, пишување блог постови и многу повеќе.

Ако замислите дека ЧетГПТ е автомобил, новиот јазичен модел познат како ГПТ-4 (GPT-4) додава помоќен мотор. Стариот ЧетГПТ можеше да чита само текст. Новиот ЧетГПТ може да предложи рецепт за вечера врз основа на фотографија од содржината на вашиот фрижидер.

Стариот ЧетГПТ постигна скор 10 на правосудниот испит, а новиот 90. За неколку часа по објавувањето, луѓето го користеа за да креираат веб-страници, за рачно нацртани скици, па дури и за прелистување на веб-страници за запознавање во потрага по нивниот идеален партнер.

Сепак, ова е само забавниот дел од претставувањето на моќниот јазичен модел во јавноста. Период на меден месец... Кои се долгорочните последици?

„Опен еј-ај“ (уште еднаш) не ги откри збирките на податоци што ги користел за обука на ГПТ-4, така што истражувачите не можат внимателно да го испитаат моделот за да утврдат како тој ненамерно може да ги манипулира или дезинформира луѓето. Во поширока смисла, моделот воведува нова ера на хипер-ефикасност, каде што професионалците ќе мора да работат попаметно и побрзо - или ќе пропаднат.

За ова нема подобар пример од „Морган Стенли“ (Morgan Stanley), кој користи ГПТ-4 од минатата година. Според соопштението на банката од вторникот, „Морган Стенли“ го обучил ГПТ-4 врз основа на илјадници трудови објавени од неговите аналитичари за пазарите на капитал, класи на средства, анализа на индустријата и друго, за да создаде четбот за своите менеџери за богатство. Дневно го користат околу 200 вработени во банката, соопштија од компанијата.

„Замислете го тоа како ситуација во која нашиот главен стратег за инвестиции, главен глобален економист, стратег за глобален капитал и секој друг аналитичар ширум светот е достапен за повик за секој советник, секој ден“, посочи во официјалното соопштение, шефот на аналитиката на „Морган Стенли“, Џеф Мекмилан.

Bloomberg

Но, тука е и делот што навистина се издвојува во студијата на случај на „Опен еј-ај“:

„Мекмилан вели дека овој напор дополнително ќе го збогати односот меѓу советниците на 'Морган Стенли' и нивните клиенти со тоа што ќе им овозможи побрзо да им помогнат на повеќе луѓе“.

Колку побрзо? Портпаролот на „Морган Стенли“ ми кажа дека неговите советници сега можат за неколку секунди да го направат она што порано траело половина час, како увид во белешка од аналитичар со цел советување на клиент.

Моќните системи за вештачка интелигенција како ГПТ-4 нема да заменат голем број професионални работници, како што многумина инстинктивно стравуваат. Но, тие ќе ги стават под поголем притисок да бидат попродуктивни и побрзи во она што го работат. Ќе ја подигнат границата за она што се смета за прифатлив придонес и ќе воведат ера на ултра-ефикасност каква што не сме виделе досега.

Ова делумно им се случи на професионалните преведувачи и толкувачи. Како што алатките за вештачка интелигенција како „Гугл транслејт“ (Google Translate) и „Дип Ел“ (DeepL) станаа попопуларни меѓу деловните корисници, многу преведувачи стравуваа дека ќе бидат заменети. Наместо тоа, од нив се очекува да ја зголемат својата продуктивност и ефикасност.

Depositphotos

Пред појавата на алатките за преведување, се очекуваше професионалец да преведува меѓу 1.000 и 2.000 зборови дневно, вели Нурија Ландерас, која е професионален преведувач повеќе од 20 години. „Сега се очекува да преведат 7.000“, нагласува таа. Нејзините колеги предвидуваат дека повеќе системи за вештачка интелигенција ќе почнат да ги поддржуваат при симултан превод, но тоа може да значи и повеќе работа за преведувачите во пракса.

Исто така, ќе ја подигне границата на човечките перформанси. „Со дополнителна помош, немате изговор да оставите нешто“, додава Ландерас.

Голем дел од ова е типично за маршот на технологијата. Паметните телефони ни овозможија постојано да бидеме поврзани со работните обврски. „Слек“ (Slack) ни овозможи полесно да комуницираме со повеќе колеги во компанијата. Но, таквите алатки дополнително нè задржаа врзани за работата, одземајќи време од денот што работниците претходно можеби ги користеле за стратешко размислување или едноставно, само за да земат здив.

ГПТ-4 очигледно има потенцијал да извлече поголема ефикасност од работниците, но тоа може да дојде по цена на нашата ментална енергија. Колку и да стануваат брилијантни овие модели, внимавајте да не ве одведат чекор поблиску до исцрпеност.

Во моментов нема коментари за веста. Биди прв да коментира...

Остави коментар