Прва студија во реални услови: ВИ ги прави работниците поефикасни за 14 отсто

Работниците во одделот за услуги за корисници во софтверска фирма „Форчун 500“ (Fortune 500), на кои им бил овозможен пристап до алатаки за генеративна вештачка интелигенција, станале во просек за 14 отсто попродуктивни од оние што не користеле вакви алатки, при што најмалку квалификуваните работници имаат најголема корист.

Ова го покажуваат резултатите од нова студија на истражувачите од Универзитетот Стенфорд и Технолошкиот институт во Масачусетс (МИТ) кои го тестирале влијанието на алатките за вештачка интелигенција врз продуктивноста на компанијата во текот на една година.

Истражувањето е прво кое го мери влијанието на алатките за вештачка интелигенција врз работата, во реални услови. Претходни студии ги споредуваа способностите на големите јазични модели со задачи во областа на правото или медицината - покажувајќи дека, на пример, ГПТ-4 (GPT-4) го положува правосудниот испит со 90 отсто. Други истражувања го тестираа влијанието на технологијата врз извршувањето на изолирани задачи за пишување при работа, во мали лабораториски услови.

Резултатите од некои од овие претходни експерименти го покажаа потенцијалот, понекогаш и изненадувачки, кој големите јазични модели го имаат на работното место, вели Ерик Бринјолфсон, директор на лабораторијата за дигитална економија при Институтот за вештачка интелигенција на Стенфорд. Но, додека алатките не се тестираат во реалниот свет, рече тој, нивното влијание останува главно шпекулативно.

„Со тоа што работниците во оваа компанија ги користеа повеќе од една година, добиваме многу подобро чувство за тоа како алатките влијаат на продуктивноста во реалниот свет“, посочува Бринјолфсон, кој е еден од коавторите на студијата. „Колку што знам, ова е првпат да се прави вакво истражување во реалниот свет“.

Бринјолфсон, заедно со истражувачите од МИТ, Даниел Ли и Линдзи Рејмонд, ги следеле перформансите на повеќе од 5.000 вработени за поддршка на корисници, главно со седиште на Филипините, преку клучни метрики, како на пример колку брзо и успешно работниците можат да го решат проблемот на корисникот. Работниците биле поделени во групи: на некои им бил даден пристап до алатки за вештачка интелигенција, обучени со голема база на разговори за поддршка на клиенти, а на други не. Името на компанијата, специјализирана за софтвер за мали и средни американски бизниси, не е откриено во извештајот.

Корист за нискоквалификуваните работници

Еден од наодите на студијата е дека работниците почетници имаат најголема корист од технологијата, велат истражувачите. Со помош на вештачката интелигенција, најмалку квалификуваните работници во фирмата можеле да ги завршат своите задачи за 35 отсто побрзо. Перформансите на новите работници, исто така, се подобруваат многу побрзо со помош на вештачка интелигенција отколку без: Според студијата, вработените со двомесечно искуство кои биле потпомогнати од вештачката интелигенција имале исто толку добри или подобри резултати во многу задачи, во споредба со работниците со над шестмесечно искуство кои работеле без вештачка интелигенција.

Прочитајте повеќе: ГПТ-4 може да ја претвори работата во хиперактивен пекол

Истражувањето сугерира дека зголемувањето на продуктивноста и перформансите на нискоквалификуваните работници доаѓа, делумно, поради можноста алатките за вештачка интелигенција да го апсорбираат премолченото знаење и вештини што ги прават врвните работници на фирмата успешни - како најдобрите зборови и начини што може да се искористат за да се смири налутен клиенти или која техничка документација би била најкорисна да се сподели во секоја ситуација - а потоа да се дистрибуира тоа знаење до понеискусните работници преку предложени одговори генерирани со помош на вештачка интелигенција.

Овие наоди се спротивни на генералното мислење дека автоматизацијата најмногу ги повредува работниците со ниско ниво на вештини, како што се случуваше во текот на последните неколку децении на технолошки напредок во производството и другите индустрии.

Добивките во продуктивноста - околу 14 отсто во просек - се помалку драматични отколку во претходните експерименти, веројатно затоа што процесите на работното место во реалниот свет се многу посложени од еднократните задачи. Сепак, зголемувањето на продуктивноста и натаму е значајно. „Ова сугерира дека тие лабораториски студии биле во вистинска насока, односно не биле само фатаморгана“, вели Бринјолфсон.

Сложени прашања за компензација

Најквалификуваните работници имаат многу мала или никаква корист од воведувањето на вештачка интелигенција во нивната работа. Овие што се најдобри во својата работа веројатно веќе даваат одговорите од истиот калибар како оние што ги препорачува вештачката интелигенција, така што има помалку простор за подобрување - па дури и генерираните насоки може само да им го одвлечат вниманието, велат истражувачите.

Меѓутоа, ако вештачката интелигенција на крајот го намали јазот меѓу работниците со нискo и високо ниво на вештини, компаниите можеби ќе треба фундаментално да ја преиспитаат логиката што го поткрепува начинот на компензација.

Врвните работници во одделот за подршка на клиенти имаат табели во Ексел каде што собираат фрази што често ги користат и кои се покажале како добри во комуникацијата со корисниците, објаснува Рејмонд од MИТ. Ако алатката за вештачка интелигенција навистина го искористи ваквото премолчено знаење и го дистрибуира на другите, вели таа, „тогаш овие висококвалификувани работници прават дополнителната услуга за фирмата со тоа што ги овозможуваат ваквите примери за вештачката интелигенција, но тие не се компензирани за тоа.” Всушност, ваквата ситуација може да биде лоша за нив бидејќи нивните стимулации се базираат на перформансите во однос на другите колеги, што покренува голем број компликувани прашања за тоа како работниците треба да бидат компензирани за вредноста на нивните податоци.

Depositphotos

Компаниите кои размислуваат за иднината би било мудро да ја препознаат стручноста на своите врвни работници, бидејќи нивното премолчено знаење и вештина најверојатно ќе ја формираат основата на алатките за вештачка интелигенција што ќе биде патоказ за остатокот од организацијата, вели Бринјолфсон.

„Успешните компании би имале системи за поттикнување и наградување кои препознаваат дека овие врвни работници - без разлика дали нивните перформанси со кој било клиент се демонстративно подобри од помалку квалификуваните работници - создаваат знаење од кое зависи целата организација“, рече тој. „Не би било претерано да се одвои уште поголема премија за тие овие бидејќи вештината која тие ја имаат потоа ќе се засили и умножи низ целата организација. Врвниот работник со текот на времето може да ја промени целата организација“.

Се разбира, Бринјолфсон истакна дека сè уште сме во раната фаза на проучувањето на генеративната вештачка интелигенција и ова истражување не е последниот збор - останува уште многу да се научи.

Преобликување на работното место

Некои од забелешките добиени од теренскиот експеримент не се опфатени со податоците, но укажуваат на десетици други начини на кои овие алатки наскоро може да ги преобликуваат работните места. 

Така на пример, менаџерите во фирмата веќе не трошат 20 до 30 часа неделно обучувајќи ги вработените, посочува Рејмонд, веројатно затоа што вештачката интелигенција послужила како замена. Тоа, пак, би можело да го промени односот вработен-менаџер, бидејќи супервизорите потоа би поминувале помалку време за директни извештаи и наместо тоа би преземале поголеми тимови.

Сепак, брзината со која генеративната вештачка интелигенција се чини дека е способна да ги преобрази работните места - навидум преку ноќ - е вртоглава, особено во однос на претходните технолошки откритија.