Сноуден: ВИ и ЧетГПТ се уште поголема закана за приватноста

Вештачката интелигенција и ЧетГПТ (ChatGPT) дополнително ќе ги олеснат и подобрат методите на надзор и на тој начин ќе овозможат уште подобро собирање податоци, смета Едвард Сноуден, еден од најпознатите свиркачи во светот, кој минатиот четврток преку видеоврска се приклучи на Деновите на комуникацијата во Ровињ.

Поранешниот вработен во ЦИА и Националната агенција за безбедност (НСА) на САД, кој објави тајни документи во 2013 година што открија голем број проекти што американската влада ги користела за следење и изведување хакерски напади, е обвинет за шпионажа и побара азил во Русија, каде што минатата година доби државјанство.

„Јас би го направил тоа повторно“, рече Сноуден на конференцијата.

Во разговорот тој истакна дека сите се согласуваме на надзор и лажна слобода дури и во секојдневните постапки, како кога ќе кликнеме ОК на нов мобилен уред како знак на потврда дека се согласуваме со условите за користење што не сме ги ни прочитале.

„Постои само еден свет што го имаме и некогаш ќе го имаме, а тоа е оној што ќе го направиме. Не го наследуваме од нашите предци. Таа мисла е почетната точка, а не финишот“, рече тој. Сноуден исто така верува дека „светот каков што би можел да биде ни е блиску, но мораме да го направиме таков“. Пред сè, тоа треба да се постигне преку политички одлуки, смета тој.

„Кога ќе кликнете ОК  на нов мобилен телефон, не знаете што ќе дознаат за вас во следните пет до десет години. Само затоа што сте кликнале ОК, тоа не значи дека сте имале избор. Тоа е принуден избор, а штом не е резултат на слободна волја, тоа не е избор“, појасни Сноуден, осврнувајќи се на собирањето информации за навиките на корисниците при користење паметни телефони и апликации.

Алтернативни извори на вести

Интернетот се развива во последните десет години и може да биде добра алатка за воспоставување нов систем, но се случува ситуација каде што во услови на недоверба во медиумите се појавуваат различни алтернативни извори на вести и се радикализира јавното мислење. Најголемиот проблем е што  на тој начин станува подлабока поделбата меѓу граѓаните, што не е патот до очекуваните промени.

Тој коментираше и за тоа како американските медиуми почнале да ја третираат Белата куќа како дел од нивната редакција наместо да ги доведуваат во прашање постапките на владата. „Новинарите изнесуваат само тврдења, а не докази, а нивната улога во општеството е да бидат истражувачи во име на јавноста“, посочи Сноуден, додавајќи дека разликата меѓу руските и американските медиуми е во тоа што граѓаните немаат никаква доверба во она што го пишуваат руските медиуми, а имаат во американските.

Поголема моќ на владата

Бидејќи развојот на технологијата неодамна се фокусираше на вештачката интелигенција и машинското учење, тој истакна дека тоа само ќе ја зајакне моќта на владите. Додека во времето кога тој ги правеше потезите што му го обележија животот беше забрането собирање информации, сега на владите им е дадено алиби да го сторат тоа под превезот на развој на нова технологија - вештачка интелигенција. Машинското учење и вештачката интелигенција не само што помагаат да се зголеми базата на лични податоци и да се продолжи периодот на кој тие се чуваат туку овозможуваат и нагледување на клучните и интересни комуникации.

„Вештачката интелигенција сега се истражува и тоа ќе овозможи податоците што се чуваат 30 дена да се чуваат една година или дури три години. Проблемот со кој се соочуваме е што сериозните истражувачи што развиваат вештачка интелигенција бараат заштита и ограничена употреба на јавни документи. Тоа треба да биде алармантно“, кажа тој.

Исто така, Сноуден смета дека сите овие нови механизми и технологии треба да им бидат достапни на граѓаните за да не се создаде уште поголем јаз меѓу луѓето и институциите. Граѓаните стануваат помалку зависни од институциите преку употреба на вештачка интелигенција и технологии како ЧетГПТ, тврди тој, а одговори и на прашањето дали кога имал пристап до тајните документи на американската влада наишол на нешто интересно во однос на вонземјани. Тој рече дека барал што има, но дека е индикативно тоа што околу седумдесет години ништо не протекува во јавноста на таа тема. Тоа го протолкува така што рече дека не постои голема тајна. „Тоа е здодевната страна на американската влада, верувате дека има некоја голема тајна, но всушност вистинските илуминати читаат весници“.

Тој откри и дека не ги објавува лицата на своите деца на интернет, како и тоа дека неговата сопруга и тој на сите нивни слики им ставаат емотикон преку лицата, па дури и им ги фотошопираат ушите за никој да не ги препознае. „Не сакаме тие да живеат како мене и не знаеме што ќе се случи. Не треба да прифатиме дека ова што го имаме сега е нормално и треба да ги научиме децата дека начинот на кој сега функционираат работите не е во ред. Направив што можев, вниманието на јавноста исчезнува, но вредностите остануваат“, заклучи Сноуден.