Инфлацијата во САД малку пониска од очекуваното

Инфлацијата во САД падна повеќе од очекуваното, покажуваат податоците објавени денеска. Годишната инфлација во февруари изнесуваше 2,8 отсто, а месечната инфлација 0,2 отсто според индексот на потрошувачките цени (CPI).

Аналитичарите очекуваат вкупната годишна инфлација да биде 2,9 отсто во февруари, малку под јануарскиот годишен раст од 3 отсто. На месечна основа се очекува зголемување на цените за 0,3 отсто, значително помалку од растот од 0,5 отсто во јануари.

Иако податоците донесоа одредено олеснување, многу индикатори сè уште покажуваат дека инфлацијата повторно расте, пишува „Блумберг“. Поради серијата царини наметнати од американскиот претседател Доналд Трамп, се очекува зголемување на цените на различни производи, од храна до облека, според „Блумберг“, што ќе ја тестира отпорноста на потрошувачите и пошироката економија.

„Мораме да запомниме дека овој извештај можеби е само смиреност пред бурата. Не само што Фед треба да чека јасност за тарифната политика, туку штом ќе се воведат тарифите, веројатно ќе има барем некои зголемувања на цените, а сликата на инфлацијата може да се влоши со текот на месеците. Фед - и пазарите - сè уште не се целосно надвор од шумата“, напиша новинарката на „Блумберг“, Изабел Ли во првичната реакција.

Од инфлаторна до економска криза?

Во меѓувреме, растат стравувањата дека потезите на американскиот претседател Доналд Трамп ќе ја вовлечат американската економија во криза.

Податоците за CPI беа објавени во период кога се повеќе набљудувачи на Волстрит предупредуваат за друг можен исход за американската економија: стагфлација, известува „Јаху фајненес“ (Yahoo Finance). Стагфлацијата е економско сценарио во кое растот забавува, инфлацијата останува висока, а невработеноста расте.

Заканата од стагфлација стана поверојатна поради агресивната трговска политика на претседателот Доналд Трамп, која ги загрози финансиските пазари, и напорите на Илон Маск со Канцеларијата за владина ефикасност (DOGE), која нагло би ги намалила трошоците на федералната влада - вклучително и преку масовни отпуштања.

Инвеститорите се обложуваат дека шоковите за економијата кои ја намалуваат склоноста на Американците да трошат ќе ги надминат повисоките цени поради царините, пишува „Блумберг“.

„Инфлацијата стои зад сегашниот страв од послаб раст“, ​​изјави за „Блумберг“ Крис Дијаз, менаџер на глобално портфолио на обврзници во „Браун адвајзори“ (Brown Advisory). „Ако има рецесија, сè уште има многу простор за натамошно намалување на стапките“.

Дали Фед ќе мора да интервенира на пазарите со намалување на каматните стапки?

Трговците на пазарите за фјучерси и опции ги зголемуваат своите облози дека американската централна банка ќе мора да ги намали каматните стапки повеќе од очекуваното оваа година поради агресивната политика на администрацијата на Трамп, пишува „Блумберг“.

Како што објавивме, цените на американските обврзници пораснаа по инаугурацијата на Трамп бидејќи инвеститорите станаа позагрижени дека трговските тензии би можеле да ја турнат американската економија во рецесија. Во меѓувреме, остриот пад на акциите во САД и кратењата на државните трошоци ги намалија изгледите за раст.

Претседателот на Федералните резерви Џером Пауел минатиот месец му соопшти на Конгресот дека централната банка не треба да брза со приспособување на каматните стапки. На последниот состанок во јануари, Фед ги остави каматните стапки непроменети.

 

 

 

 

Во моментов нема коментари за веста. Биди прв да коментира...

Остави коментар