Трамп го притисна Пауел за каматите на состанокот во Белата куќа

Претседателот Доналд Трамп го притиснал претседателот на Федералните резерви (Фед), Џером Пауел, да ги намали каматните стапки на нивната прва средба лице в лице од инаугурацијата на Трамп, соопшти Белата куќа.

Претседателот му рекол на Пауел дека смета оти тој прави грешка со тоа што не ги намалува каматните стапки, изјави портпаролката на Белата куќа, Каролин Левит, на брифинг во четвртокот.

„Тоа нè става во економска неповолност во однос на Кина и други земји, и претседателот за тоа зборува јавно, а сега можам да откријам, и приватно“, додаде таа.

Левит изјави дека не разговарале дали Трамп ќе се обиде да го смени Пауел од функцијата. Мандатот на Пауел како претседател на Фед истекува во мај 2026 година.

На средбата присуствувале и неколку члена на администрацијата, меѓу кои потпретседателот Џеј Ди Венс, секретарот за финансии Скот Бесент, секретарот за трговија Хауард Латник и директорот на Националниот економски совет Кевин Хесет, според официјално лице од Белата куќа.

Фед објави во соопштение дека двајцата се сретнале по покана на претседателот и разговарале за економски случувања, вклучувајќи раст, вработеност и инфлација. Последен пат се сретнале лично во ноември 2019 година.

„Претседателот Пауел не ги сподели очекувањата за монетарната политика, освен што нагласи дека нејзината насока ќе зависи целосно од новите економски податоци и нивното значење за перспективите“, соопштија од Фед.

Пауел исто така му рекол на претседателот дека одлуките на централната банка ќе се базираат исклучиво на „внимателна, објективна и неполитичка анализа“, што го потврди и Левит.

Средбата се одржа непосредно по судската одлука во средата, која блокира многу од царините што Трамп ги воведе годинава. Апелацискиот суд во четвртокот привремено ја стопира таа одлука, дозволувајќи царините засега да останат во сила.

Фед ја задржа каматната стапка непроменета во текот на 2025 година, аргументирајќи дека е потребен претпазлив пристап поради неизвесноста предизвикана од проширената и променлива царинска политика на Трамп. Оние што ги кројат политиките на Фед предупредуваат дека новите царини ќе го забават економскиот раст и ќе ја зголемат инфлацијата.

Притисокот од Трамп

Ставот на воздржаност на Фед се соочи со критики од Трамп, кој постојано бара намалување на каматните стапки и го критикува лидерството на Пауел. Трамп изјави дека Пауел често доцни со приспособување на политиките и го нарече „голем губитник“, меѓу другите навреди.

Една објава на Трамп од април на социјалните мрежи повторно поттикна шпекулации дека би можел да се обиде да го разреши Пауел, што првпат се појави како идеја за време на неговиот прв мандат. Подоцна Трамп ја повлече таа изјава, а неодамнешна одлука на Врховниот суд го заштити Фед од такви интервенции, како дел од поширока пресуда за овластувањата на претседателот врз независните агенции.

Пауел повеќепати нагласува дека политиката на Федералните резерви е аполитична и се темели на она што е најдобро за економијата. Тој ја повторил таа порака и на средбата со Трамп во четвртокот.

„Претседателот и членовите на Комитетот за отворен пазар ќе ја водат монетарната политика, како што бара законот, за да ги поддржат максималното вработување и стабилните цени, и одлуките ќе ги носат исклучиво врз основа на внимателна, објективна и неполитичка анализа“, изјавија од Фед.

 

Во моментов нема коментари за веста. Биди прв да коментира...

Остави коментар