ЕУ предупредува дека ќе се одмазди дури и ако Трамп воведе минимални царини

Европската унија планира да воведе одмазднички царини за увоз од САД, вклучително и за авионите на „Боинг“, доколку претседателот Доналд Трамп воведе основна царина за стоките од ЕУ, како што многумина очекуваат.

Официјални претставници на ЕУ очекуваат дека САД ќе задржат дел од царините, дури и по завршувањето на трговските преговори. Досега, Европската комисија, која е надлежна за трговските прашања на Унијата, не даде навестување дали тоа ќе предизвика одмазднички мерки од страна на блокот.

„Ќе треба да возвратиме и да постигнеме рамнотежа во неколку клучни сектори ако САД инсистираат на несиметричен договор“, изјави за „Блумберг Њуз“ комесарот за индустрија на ЕУ, Стефан Сеџурне, вклучувајќи и ако „исходот од преговорите биде задржување на 10 отсто царина.“

ЕУ брза да постигне договор со Вашингтон пред на 9 јули да стапат во сила тарифи што ќе ги зголемат речиси сите нејзини извози во САД на 50 отсто. Трамп жестоко ја критикуваше ЕУ — за која рече дека е создадена за да ги „оштети“ САД — поради нејзиниот трговски суфицит и бариерите за американската трговија. ЕУ проценува дека американските царини во моментов опфаќаат 380 милијарди евра (439 милијарди долари), или околу 70 отсто од нејзиниот извоз во САД.

Преговорите добиваат на интензитет, а Комисијата прави сè за да постигне решение што ќе биде во корист на двете страни, изјави функционер на ЕУ кој побара да остане анонимен. Комисијата им кажала на земјите членки минатата недела дека САД инсистираат на барања кои би довеле до нефер договор, објави претходно „Блумберг“.

Комисијата, која се обидува да постигне заемно корисен договор, ќе го процени секој постигнат резултат и дури тогаш ќе одлучи какво ниво на несиметрија – ако воопшто е подготвена – ќе прифати, пренесе „Блумберг“. Секоја одлука за одмазднички мерки ќе мора да биде координирана и усогласена со земјите членки.

Меѓу американските барања се мерки поврзани со квоти за извоз на риба, за кои функционери од ЕУ велат дека можеби се во спротивност со правилата на Светската трговска организација; царински потези кои не се заемни; и серија барања за економска безбедност, кои претставници од блокот ги опишуваат како претерани, пренесе „Блумберг“.

Мнозинството во ЕУ очекуваат дека поголемиот дел од царините на САД ќе останат на сила дури и ако се постигне договор, вклучувајќи и основна царина од 10 отсто. Обединетото Кралство потпиша договор со САД овој месец, според кој речиси целиот британски извоз останува подложен на таа 10 отсто царина.

„Разбирам дека САД ја земаат 10-процентната царина како основа“, изјави во понеделникот во Берлин еврокомесарот за трговија Марош Шефчович. „И ние работиме на мерки за ребалансирање, кои ќе ги заштитат европските компании и европските работници во случај да не постигнеме правичен договор“ додаде тој.

Една од индустриите што ќе биде изложена во евентуална трговска војна е цивилната авијација. Стефан Сеџурне изјави дека францускиот производител на авиони „Ербас“, со седиште во Тулуз, не смее да биде предмет на „нефер конкуренција“ од страна на американскиот „Боинг“, со седиште во Арлингтон, Вирџинија, особено затоа што европскиот производител се соочува со дополнителна царина од 10 отсто.

„Ако не воведеме мерки за ребалансирање, ќе оставиме некои водечки сектори незаштитени, така што постои економски интерес за такво дејствување“, додаде тој.

Bloomberg

Дури и ако преговорите се одвиваат добро, многу Европејци го сметаат најдоброто можно сценарио за договор во принцип, што би овозможил продолжување на преговорите и по рокот од 9 јули, со што би се продолжило и сегашното примирје, претходно објави „Блумберг“.

ЕУ веќе има одобрено царини американски производи во вредност од 21 милијарда евра, кои можат брзо да се активираат како одговор на царините што Трамп ги воведе за извозот на алуминиум и челик. Цел на тие давачки се политички чувствителни сојузни држави во САД, и вклучуваат производи како соја од Луизијана (дом на претседателот на Претставничкиот дом Мајк Џонсон), како и земјоделски производи, живина и мотоцикли.

Покрај тоа, блокот подготвува и дополнителна листа на царини за американски производи во вредност од 95 милијарди евра, како одговор на таканаречените реципрочни царини и царините за автомобили што ги најави Трамп. Таа листа може да се менува во зависност од барањата на земјите членки и индустриите кои сакаат да ги заштитат своите сектори.

САД веќе воведоа царини за европски автомобили, челик и алуминиум. Трамп најави и дека американската влада работи на проширување на царините и на други сектори, вклучувајќи фармацевтски производи, полуспроводници и комерцијални авиони.

Трамп изјави пред новинарите овој месец, на враќање од Самитот на Групата на седумте во Канада, дека не чувствува оти ЕУ нуди „фер договор“.

„Или ќе постигнат добар договор, или ќе платат онолку колку што ќе кажеме дека треба да платат“, рече тој.

Во моментов нема коментари за веста. Биди прв да коментира...

Остави коментар