Многу корпоративни планови за климатска транзиција не се реални, покажуваат студиите

Ефектите од климатските промени се интензивираат, но бизнисите низ светот се борат да направат планови за транзиција што можат да ги применат во реалниот свет, покажува извештајот од Лондонската школа за економија и политички науки, објавен денеска.

Студијата за корпоративната клима ги разгледува објавите од 2.000 јавно тргувани компании, кои заедно претставуваат три четвртини од јавно котираните акции низ целиот свет и 87 билиони долари пазарна капитализација. Авторите откриваат дека само два отсто откриле планови за пренасочување на капиталот од средства со висок удел на јаглерод или за усогласување на својата потрошувачка со долгорочните цели за декарбонизација.

Повеќето од вклучените компании во анализата ги препознаваат климатските промени. Повеќе од 95 отсто имаат политичка обврска да дејствуваат во врска со климата. Но, само околу 10 проценти добија највисока оценка од авторите за квалитетно управување, што укажува дека компанијата почнала стратешки да ги интегрира климатските промени во своето работење. Интересно е што 22 процента не поминуваат еден или повеќе од следниве тестови: да воспостават политика за климата, да откријат оперативни емисии или да постават цел за емисиите.

Bloomberg Mercury

 

Се очекува корпорациите да играат голема улога во декарбонизацијата на економијата, но резултатите досега се слаби. Некои региони бараат да се објавуваат информации за емисиите и транзициските планови, а регулаторите во Европа ги поттикнуваат компаниите да дејствуваат повеќе на ова поле. Но извештајот покажува дека поголемиот дел од нивните планови не е веродостоен. Така е поради повеќе причини. Многу компании не вложуваат доволно капитал за декарбонизација, а некои премногу се потпираат на недокажани технологии, пишува во извештајот. Околу една третина не ги откриваат материјалните емисии од опсег 3, кои го мерат влијанието на јаглеродот на нивните синџири на снабдување.

„Како што се забрзува темпото на потребните намалувања на емисиите, кредибилитетот сè повеќе зависи од планови што се амбициозни и остварливи“, пишуваат авторите на книгата „Состојбата на корпоративната транзиција 2025“ (State of the Corporate Transition 2025).

По најжешката година во историјата, силни бури, суши, пожари и поплави погодија различни делови од светот, предизвикувајќи загуби што се бројат во милијарди долари. Истражувачите проценија пад на глобалното економско производство од 17 проценти до средината на векот токму поради климатските промени; до 2100 година таа бројка се проценува дури на 60 отсто. Климатските катастрофи би можеле да го намалат глобалниот економски раст до три отсто во следните пет години, според Мрежата за озеленување на финансискиот систем (NGFS).

Но политичкиот отпор против климатските промени го „ослабе замавот“ за ублажување на последиците од страна на глобалните компании, се посочува во извештајот. Администрацијата на Трамп ги критикуваше напорите во областа на заштитата за животната средина, општеството и управувањето во инвестирањето, па презеде чекори за ослабнување на законите за животна средина во најголемата економија во светот.

Студијата исто така анализира и помала група од околу 550 компании за тоа колку добро нивните патеки за емисии се усогласени со целите на Парискиот договор, применувајќи пристап специфичен за секторот. Многу компании поставија нето нулта цели за 2050 година, но поголемиот број или не поставија долгорочни цели или нивните цели имаат ограничен опсег во однос на емисиите во животниот циклус на нивните производи.

Bloomberg Mercury

 

Како група, овие компании очекуваат да ги надминат буџетите за интензитет на емисиите за 61 отсто, соодветно на затоплувањето од 1,5 Целзиусов степен.

Сега, во своето шесто издание, извештајот укажува на напредок: 30 проценти од оценетите компании се усогласени со патеката од 1,5 Целзиусов степен, во споредба со само девет отсто во 2020 година. Секторот за нафта и гас оствари најбавен напредок во намалувањето на интензитетот на емисиите во периодот меѓу 2020 и 2023 година, велат авторите. Бродарството е единствениот сектор што ја надминува својата референтна точка со целта од 1,5 Целзиусов степен, а тој напредок го предводат две големи компании со релативно амбициозни цели за нето нула емисии.