САД објави насоки за планот за ограничување на цената на руската нафта

Американското Министерство за финансии издаде строги насоки за имплементација на предложените горни граници за цената на руската нафта, што се однесуваат на документацијата потребна за приватниот сектор да се прилагоди со програмата.

Насоките што ги издаде Канцеларијата за контрола на имот во странство при Министерството за финансии (OFAC), им даваат задача на приватните компании да ги спроведат ограничувањата на тој начин што ќе бараат потврди дека руската нафта се продава по пониска цена од максималната што ја одредија Соединетите Американски Држави (САД) заедно со другите членки на Групата 7 (Г7). Насоките се наменети за осигурителните друштва и финансиските компании, кои ја олеснуваат меѓународната трговија со нафта.

Ограничувањето би требало да биде во сила до 5 декември за суровата нафта, а до 5 февруари 2023 година за нафтените деривати, што е во согласност со спроведувањето на забраната на Европската Унија (ЕУ) за услуги поврзани со поморската нафта и преработените производи.

Планот ќе се базира на водење евиденција од страна на секоја страна во ланецот снабдувачи со морска руска нафта, што ќе овозможи да се покаже или потврди дека нафтата е купена по максималната горна граница или под тоа.

„Учесниците кои редовно имаат пристап до информациите за цени во редовното работење, како трговските посредници и рафинериите, би требало да ги задржат и по потреба да ги споделуваат документите, кои покажуваат дека морската руска нафта е купена по максималната цена или за помалку“, велат од OFAC.

Компаниите кои што немаат директен пристап до информациите за цените би требало да го побараат тоа, а ако и натаму не можат да ги добијат информациите за цените, тогаш би требало да побараат потврда од купувачот во која што тој ќе се обврзе дека нема да ја купува морската руска нафта по повисока цена од максималната.

OFAC предупредува да се внимава на одредени „знаци на опасност“, што може да укажуваат на можно кршење на ограничувањата на цените, вклучително одбивање или одолговлекување да се дадат информации за цените, невообичаено поволни услови за плаќање и слични знаци на манипулација со документите.

Американскиот заменик министер за финансии нагласи дека преку земјите од ЕУ и Г7 се реализира 70 проценти од глобалното осигурување на бродовите, заедно со најголем дел од услугите за финансирање и плаќање на пазарот. Тој истакна и дека државите од Г7 работат на тоа на компаниите да им се олесни придржувањето до горната граница на цената на нафтата, а истовремено да се наметнат и последици ако компаниите се обидат да го заобиколат ограничувањето.

Во моментов нема коментари за веста. Биди прв да коментира...

Остави коментар