Гувернерот на Фед, Кристофер Волер, изјави дека неговата одлука за тоа дали ќе поддржи намалување на каматната стапка на следниот состанок за монетарната политика во американската централна банка ќе зависи од претстојните податоци за пазарот на трудот.
Волер рече дека може да биде соодветно каматните стапки да останат непроменети кога Федералниот комитет за операции на отворен пазар ќе се состане на 17 и 18 март, доколку податоците за пазарот на трудот за февруари покажат, како и во јануари, дека ризиците од влошување на состојбите на пазарот на трудот се намалени.
„Но, ако податоците за пазарот на трудот од јануари бидат коригирани со послаби бројки или ако февруарските податоци не ја потврдат позитивната слика, тоа би ја поткрепило мојата позиција од последниот состанок на Комитетот дека намалување од 25 базични поени на каматната стапка беше соодветно и дека такво намалување треба да се направи на мартовскиот состанок“, изјави тој во понеделникот, во обраќање на настан во Вашингтон, во организација на Националната асоцијација за бизнис-економија.
Во јануари Волер не се согласи со одлуката на Фед да ја остави непроменета референтната каматна стапка, наведувајќи дека преферирал намалување од 25 базични поени поради знаци на слабеење на пазарот на трудот. Владиниот извештај за вработеноста за јануари, кој беше објавен подоцна, сепак се покажа значително подобар од очекувањата, бидејќи американската економија отвори работни места со солидно темпо, а стапката на невработеност се намали.
„Под претпоставка дека базичната инфлација и натаму сигнализира дека сме блиску до нашата цел од 2 отсто, клучно за носење соодветна политика ќе биде мојата процена за пазарот на трудот“, рече Волер.
„Како што стојат работите денес, овие две можни сценарија за мене се речиси како фрлање паричка.“
Волер рече дека ги поздравува позитивните бројки, но додаде дека има загриженост дека тие „можеби содржат повеќе ‘врева’ отколку суштински сигнал“, особено затоа што ревизиите на податоците во извештајот покажале дека нето-креирањето работни места во 2025 година било блиску до нула. Според него, тоа укажува дека пазарот на трудот во текот на 2025 година бил „слаб“ и „кревок“.
Бирото за трудова статистика треба да го објави извештајот за вработеноста за февруари на 6 март.
Изгледи за инфлацијата
Волер повтори дека и понатаму ги исклучува ефектите од трговските политики на претседателот Доналд Трамп при процената на инфлацијата.
„Проценувам дека она што го нарекувам базична инфлација, односно инфлација без ефектите од царините, е блиску до целта на Комитетот од 2 отсто“, рече тој.
Тој додаде дека одлуката на Врховниот суд во петокот, со која беше поништен голем дел од царините што Трамп ги воведе користејќи вонредни овластувања, веројатно нема значително да влијае врз неговиот став за тоа како треба Фед да ја води монетарната политика.
.webp){kind=icon}
