Зелените проекти им носат на банките повеќе пари од нафтата, гасот и јагленот

Најголемите банки од Волстрит веќе четврта година по ред остваруваат повеќе добивка од финансирање на зелени проекти отколку од работење со компании од секторот на фосилни горива, и тоа и покрај сè поголемиот притисок да се повлечат од овој дел од бизнисот.

Според податоците собрани од Bloomberg, банките во 2025 година оствариле околу 3,7 милијарди долари приход од кредити и издавање обврзници поврзани со климатски проекти, додека бизнисите со нафта, гас и јаглен им донеле околу 2,9 милијарди долари.

Ова претставува голем пресврт во однос на 2020 година, кога банките од компаниите од секторот на фосилни горива наплаќале речиси двојно поголеми такси отколку од финансирање на зелени иницијативи.

Растечката побарувачка за капитал поврзан со енергетската транзиција, вклучувајќи обновливи извори и батерии, доведе до силен раст на издавањето зелени обврзници, истакнува Грејс Осборн од Bloomberg Intelligence. Таа додава дека банките повеќе не се вклучуваат во одржливост поради имиџ, туку затоа што таму се бизнисите, таксите и можностите за раст.

Според Bloomberg, BNP Paribas, Crédit Agricole и Deutsche Bank минатата година биле водечки во организацијата на зелени обврзници. Од друга страна, JPMorgan Chase, Citigroup и Bank of America предводеле во издавањето обврзници за компании од секторот на фосилни горива.

Bloomberg

Сепак, приходот од зелено финансирање од 3,7 милијарди долари е помал од минатата година, кога банките преку овие бизниси оствариле околу 4,2 милијарди долари. Намалувањето се случи откако неколку банки ја напуштија Net-Zero Banking Alliance, иницијатива насочена кон намалување на јаглеродниот отпечаток на финансискиот сектор, обидувајќи се да се заштитат од сè поголемиот политички притисок по враќањето на Доналд Трамп во Белата куќа.