Уште еден опасен случај на „Полимаркет“: манипулација со податоци ја загрози безбедноста на летовите

Француската метеоролошка служба се посомневала на манипулација со временските сензори на најголемиот аеродром во земјата и случајот го пријавила во полиција, откако открила невообичаени отчитувања паралелно со засилено обложување на популарна платформа за предвидувања.

Автоматските мерења на температурата на метеоролошката станица на „Метео Франс“ (Météo France) на аеродромот „Шарл де Гол“ нагло скокнале за четири, односно пет степени во вечерните часови на 6 и 15 април. Податоците од станицата покажуваат дека токму тогаш била забележана и највисоката температура тој ден на таа локација.

Тие податоци се важни за безбедното функционирање на аеродромот. Истовремено служат и за порамнување на договори за дневната највисока температура на „Полимаркет“ (Polymarket), според информациите од платформата на која корисниците вложуваат пари на исходи од реалниот свет.

Обложувањето на временски прилики силно пораснало на платформите за предвидувања како „Полимаркет“ и „Калши“ (Kalshi). Одделни трговци и метеоролози сè почесто вложуваат пари на прогнози за температури, количина дожд или снег во одредени подрачја и на одредени датуми.

Поддржувачите тврдат дека ваквите пазари создаваат економска и општествена вредност бидејќи нудат подобар увид во тоа што би можело да се случи. Критичарите, пак, сметаат дека станува збор за разубавена форма на обложување, чувствителна на манипулации, тргување со привилегирани информации и слични злоупотреби.

Сомнежи се појавиле и кај други договори на пазарите за предвидувања, вклучително и тврдењата на еден израелски новинар дека корисници на „Полимаркет“ вршеле притисок врз него да го смени текстот за ракетни напади во близина на Ерусалим.

Температурни аномалии на парискиот аеродром/Bloomberg

На неправилностите во податоците предупредија учесници на пазарите за предвидувања и независни метеоролози на еден француски форум посветен на времето. Тие ги доведоа во прашање и резултатите од договорите што привлекле околу 1,4 милиони долари вкупни уплати, покажуваат податоците на „Полимаркет“. Вкупниот износ за секој од тие договори бил повеќе од двојно поголем од вообичаениот обем кај други дневни договори за температура во Париз во текот на април.

Портпаролот на „Метео Франс“ (Météo France), Лоран Беклер, изјави дека техничари ги прегледале податоците од сензорите и ја посетиле метеоролошката станица, по што службата во полиција пријавила сомнеж за попречување на работата на автоматизираниот систем за обработка на податоци.

Беклер не сакаше да одговара на дополнителни прашања за можна манипулација и неправилности во податоците. Полицијата на аеродромот исто така не сакаше да ја коментира пријавата и новинарите ги упати кон судските власти, кои одбија да дадат повеќе информации. Аеродромот „Шарл де Гол“ не го коментираше случајот. Претставници на „Полимаркет“ (Polymarket) не одговорија на прашањата за тие договори.

На интернет-страницата на „Полимаркет“ стои дека платформата на 19 април за париските облози за температура наместо податоците од аеродромот „Шарл де Гол“ почнала да користи податоци од аеродромот „Париз Ле Бурже“.

Метеорологот Рубен Халали, извршен директор и коосновач на париската компанија „ХД Рејн“ (HD Rain), изјави дека бил меѓу оние што до „Метео Франс“ пријавиле сомнителни податоци, каде што и самиот претходно работел.

Халали вели дека внимателно ја следи метеоролошката станица на аеродромот бидејќи неговата компанија таму сертифицира параметриски осигурувања за клиенти, односно полиси што се активираат кога ќе се исполнат однапред зададени услови, без потреба од докажување штета. Токму затоа многу брзо забележал дека некој манипулирал со податоците.

Според него, податоците за 15 април особено отстапуваат. Тој ден температурата во доцните попладневни часови достигнала 18,8 степени, а потоа почнала да паѓа. Потоа за само 12 минути скокнала од 16,9 на 21,9 степени, покажуваат податоците од метеоролошката станица. Во исто време нагло паднало и нивото на влажност во воздухот, рече Халали.

Податоците од „Полимаркет“ (Polymarket) покажуваат дека еден учесник заработил повеќе од 21.000 долари обложувајќи се дека 18 степени нема да бидат највисоката температура измерена тој ден.

Халали предупредува дека последиците од манипулација со сензорите на аеродромот би можеле да бидат сериозни. Тие податоци на пилотите и контролорите на воздушниот сообраќај им даваат клучни информации за температурата, ветерот, видливоста и другите услови.

Контролата на летови и екипажите ги користат тие податоци при полетување и слетување, при избор на писта, како и при одредување рути и растојание меѓу авионите. Халали додава дека податоците од метеоролошката станица служат и за калибрација на висината на летот и потрошувачката на гориво кај други авиони.

Ако во тие податоци има грешка, тоа може да биде многу опасно.