Шефот на „Ексон“: Европа ќе загуби многу увоз на енергија поради новата климатска регулатива

Европа ќе почне да губи увоз на енергија во 2027 година, кога ќе стапи во сила новата ригорозна регулатива за метан, според Дарен Вудс, главниот извршен директор на „ЕксонМобил“ (ExxonMobuil Holdings Corp.).

Вудс е еден од бројните критичари на Директивата за длабинска анализа на корпоративната одржливост (Corporate Sustainability Due Diligence Directive)  на Европската унија, широк сет на регулативи што ги прават плановите за нула штетни емисии задолжителни и важат за надвор од Европа за сите глобални синџири на снабдување на компаниите. Вудс рече дека никој во индустријата не може да го исполни законот каков што е сега.

„Тие го отежнуваат она што веќе е многу лоша политика“, изјави Вудс за „Си-ен-би-си“ во петокот. „И се обидуваме да објасниме - особено во време како ова кога светот има недостиг од производи, а ЕУ не е особено дефицитарна со производи - дека треба да имате политики што ја отвораат трговијата и ви даваат пристап до што е можно повеќе, наместо да продолжувате да се обидувате да ја ограничувате.“

Законодавството е точка на спор со администрацијата на Трамп, предизвикувајќи закани за обновена трговска војна меѓу САД и ЕУ. Несогласувањата се интензивираа откако САД, Катар и другите земји производители на гас го предупредија блокот дека регулативите би можеле да ги загрозат испораките на енергија.